निर्वाचन प्रचारमा एआई दुरुपयोग गरे कारबाही गर्ने विज्ञापन बोर्डको चेतावनी

काठमाडौं । नेपाल सरकारको विज्ञापन बोर्डले निर्वाचन प्रचार–प्रसारका क्रममा कृत्रिम बौद्धिकता (एआई) तथा सामाजिक सञ्जालको दुरुपयोग नगर्न राजनीतिक दल, उम्मेदवार र सर्वसाधारणलाई आग्रह गरेको छ ।

प्रतिनिधिसभा सदस्य निर्वाचन आचारसंहिता, २०८२, विज्ञापन (नियमन गर्ने) ऐन, २०७६ तथा सम्बन्धित नियमावली र आचारसंहितालाई आधार मान्दै बोर्डले प्रेस विज्ञप्ति जारी गर्दै भ्रामक, तथ्यहीन तथा द्वेषपूर्ण सामग्री प्रकाशन–प्रसारण नगर्न चेतावनी दिएको हो ।

बोर्डका अनुसार पछिल्लो समय सामाजिक सञ्जालमा उम्मेदवारको फोटो तथा भिडियो एआईमार्फत सम्पादन गरी भ्रामक सामग्री फैलाउने, नक्कली खाता प्रयोग गर्ने तथा होच्याउने किसिमका सामग्री पोस्ट गर्ने प्रवृत्ति बढेको पाइएको छ । यस्ता गतिविधि कानूनविपरीत भएकाले सम्बन्धित निकायसँग समन्वय गरी आवश्यक कारबाही गरिने जनाएको छ ।

साथै, निर्वाचन आचारसंहिता विपरीत पोस्टर, पम्प्लेट, होर्डिङ बोर्ड तथा अन्य प्रचार सामग्री प्रकाशन–प्रसारण नगर्न र आचारसंहिताको पूर्ण पालना गर्न बोर्डले सबै सरोकारवालालाई अनुरोध गरेको छ ।