जस नेपालको प्रतिवद्धता : न्यायिक सुशासन, कानूनको शासन

आरदणीय पाठकवृन्द !

अनलाइन पत्रकारिताको भीडमा हामी एउटा अलग्गै पहिचान बोकेर आजदेखि तपाईहरुसमक्ष औपचारिकरुपमा आएका छौं । उत्तेजक, पूर्वाग्रही एवं ‘फेक न्युज’ को बाढीमा जस नेपाल डटकम एउटा अनलाइन पत्रकारिताको संख्या मात्र रहने छैन, यसले गुणात्मक रुपमै फरक सामग्री र भिन्न पहिचान प्रस्तुत गर्ने छ भन्ने हामी विश्वास दिलाउन चाहन्छौं ।

कानूनी बिटका सामग्रीहरु हाम्रो प्राथमिकतामा रहने छन् । अमूक दल, विचार वा समूहको निरपेक्ष वकालत वा विरोधबाट टाढा रहँदै हामी अदालत, न्याय प्रशासन, संविधान, कानून र विधिशास्त्रबारे एकेडेमिक बहस गर्न रुचाउँछौं । दैनिक घटनाका पछाडि दौडने हाम्रो रुची छैन । कहाँ कस्तो घटना भइरहेको छ भने ‘इभेन्ट’ बारे थाहा पाउनका लागि देशमा प्रशस्तै अनलाइन, पत्रपत्रिका, टीभी र रेडियो र सामाजिक सञ्जालहरु छँदैछन् । घटनाका पछाडि दौडने थप नयाँ अनलाइन पत्रिकाको आवश्यकता छैन भन्ने हाम्रो ठहर हो । त्यसर्थ, हामी कानूनी क्षेत्रका विश्लेषणात्मक विषयवस्तुलाई प्राथमिकता दिने छौं । न्याय प्रशासनको संरचनागत एवं नीतिगत सुधारतर्फ हामी ‘वाचडग’ को भूमिका खेल्ने छौं ।

देशमा विस्तारै अराजकता र अपराधका घटना बढ्दै गइरहेका छन् । कानून र राज्यका संरचनाहरुलाई नमान्ने र नियम उल्लंघन गर्ने क्रम बढ्दो छ । राज्यका जिम्मेवार निकायहरु जनताप्रति जिम्मेवार नहुने र भ्रष्टाचार मौलाउने क्रम बढ्दो छ । यो स्थितिलाई सम्हाल्न देशमा कस्तो संवैधानिक, कानूनी एवं संरचनागत व्यवस्था चाहिन्छ ? यसको जवाफ खोज्ने काम सर्वत्र भइरहेको छ तर उपयुक्त जवाफ मिलेको छैन । यसको जवाफ खोज्नका लागि राष्ट्रिय बहसको खाँचो छ ।

त्यस्तो बहस गर्ने वौद्धिक फोरमको खाँचो छ । यही खाँचो पूरा गर्ने उद्देश्यले डिजिटल लिगल जर्नलका रुपमा जस नेपाल डटकम स्थापना गरिएको हामी सगर्व घोषणा गर्न चाहन्छौं ।

यसअघि हामीले सन् २०१३ मै नेपाल कानून डटकममार्फत् कानूनी बिटको पत्रकारिता प्रारम्भ गरेका थियौं । उक्त कदमले निरन्तरता पाउन नसके पनि सन् २०२५ मा आइपुग्दा जस नेपाल डटकम त्यही इतिहासको एउटा निरन्तरता समेत हो ।

हामी मिडिया पारदर्शीरुपमा सञ्चालन हुनुपर्छ भन्ने विश्वास राख्छौं । राज्यका अन्य निकायमा जस्तै मिडियामा पनि बृहत् सुधारको खाँचो छ । समाजको अरु क्षेत्र मात्र सुधिएर पुग्दैन, पत्रकारिता पनि सुध्रनैपर्छ ।

न्यायिक बिटमा काम गर्नका लागि डिजिटल प्लेटफर्म बनाइरहँदा हामीसँग जुन उत्साह र इच्छाशक्ति छ, त्यसको तुलनामा स्रोत–साधन अत्यन्त न्यून छ । हाम्रो आशा र भरोसा भनेकै तपाई पाठक, शुभेच्छुक र विज्ञापनदाताहरु हुनुहुन्छ । यसर्थ, जस नेपालमा लिगल कन्टेन्ट, सूचना, लेख रचना, सल्लाहका साथै विज्ञापनसमेत उपलब्ध गराई हाम्रो हौसला बढाइदिनुहुनेछ भन्ने पूर्ण विश्वास लिएका छौं ।

अधिवक्ता हरिप्रसाद मैनाली

प्रवन्ध निर्देशक, जस नेपाल डटकम