काठमाडाैं । मधेस प्रदेशका मुख्यमन्त्री सरोजकुमार यादवको नियुक्तिसम्बन्धी विवादमा दायर रिटको सुनुवाइ आज पनि जारी रहने भएको छ। बिहिबार बहस नसकिएपछि मुद्दा ‘हेर्दाहेर्दै’मा राखिएको थियो।
न्यायाधीशद्वय हरिप्रसाद फुयाँल र नित्यानन्द पाण्डेको संयुक्त इजलासले रिटमा उठाइएका दाबी–प्रमाणका आधारमा थप छलफल गर्दै सुनुवाइ अगाडि बढाएकाे छ।
मुख्यमन्त्री यादवको नियुक्ति असंवैधानिक भएको दाबी गर्दै नेपाली कांग्रेस संसदीय दलका नेता कृष्णप्रसाद यादवसहित ७४ जना सांसदले सर्वोच्च अदालतमा रिट दायर गरेका थिए। उनीहरूले संविधानको प्रावधान विपरीत सरकार गठन भएको आरोप लगाउँदै मुख्यमन्त्री नियुक्ति र सपथ दुवै रद्द गर्न माग गरेका छन्।
यसअघि रकीप्रसाद यादवसहितले दायर गरेको अर्को रिटमा सर्वोच्च अदालतले मुख्यमन्त्री यादवलाई मधेस प्रदेशमा दीर्घकालीन प्रभाव पार्ने कुनै पनि नीतिगत वा कार्यकारी निर्णय नगर्न अन्तरिम आदेश जारी गरिसकेको छ। न्यायाधीश टेकप्रसाद ढुंगानाको इजलासले जारी गरेको उक्त आदेशका बीच आज पुनः सुनुवाइ हुँदैछ।
