धनुषा–१ का उम्मेदवार किशोरी साहको रिट आज सर्वोच्चमा सुनुवाइ हुँदै

काठमाडौँ । राष्ट्रिय स्वतन्त्र पार्टीका धनुषा–१ का उम्मेदवार किशोरी साहले दायर गरेको रिटमाथि आज (आइतबार) सर्वोच्च अदालतमा सुनुवाइ हुँदैछ ।

रिटमाथि न्यायाधीशद्वय विनोद शर्मा र मेघराज पोखरेलको संयुक्त इजलासमा पेसी तोकिएको हो । धनुषा–१ मा उम्मेदवारी खारेज भएपछि साहले सर्वोच्च अदालतमा रिट दिएका थिए ।

यसअघि उक्त रिटमाथि न्यायाधीशद्वय शारंगा सुवेदी र टेकप्रसाद ढुंगानाको संयुक्त इजलासमा सुनुवाइ भई साहलाई कालोसूचीमा राख्ने निर्णय कार्यान्वयन नगर्न अन्तरिम आदेश जारी गरिएको थियो । सोही आदेशमा संलग्न न्यायाधीश भएकाले आइतबार फरक इजलासमा पेसी तोकिएको हो ।

निर्वाचनको दुई दिनअघि कालोसूचीमा परेको आधारमा साहको उम्मेदवारी खारेज भएको थियो । तर मतदानमा उनको चुनाव चिन्ह घण्टीमा सबैभन्दा बढि मत परेको थियो । निर्वाचन आयोगले भने नेकपाका मातृका यादवलाई विजयी घोषणा गरेको छ । साहले आफू योग्य उम्मेदवार भएको र बढी मत पाएको दाबी गर्दै अदालतमा रिट दायर गरेका हुन् ।

याे पनि – सर्वोच्चको अन्तरिम आदेशपछि धनुषा–१ का रास्वपा उम्मेदवारको नाम कालोसूचीबाट हट्ने