भक्तपुरमा महिला कानुन व्यवसायीको ३२औँ राष्ट्रिय सम्मेलनको तयारी

काठमाडौँ । नेपाल बार एशोसिएशनले महिलाको समानुपातिक समावेशिताबारे बहस गर्न महिला कानुन व्यवसायीको ३२औँ राष्ट्रिय सम्मेलन चैत ६–७ गते भक्तपुरमा आयोजना गर्ने भएको छ।

नेपाल बार एशोसिएशनले महिला कानुन व्यवसायीहरूको ३२औँ राष्ट्रिय सम्मेलन आगामी चैत ६ र ७ गते भक्तपुरमा आयोजना गर्ने भएको छ। “महिलाको समानुपातिक समावेशिता : परिवर्तन र न्यायपूर्ण समाजको सुनिश्चितता” भन्ने नारासहित सम्मेलन आयोजना गर्न लागिएको हो।

बार एशोसिएशनले मंगलबार जारी गरेको सूचनाअनुसार सम्मेलन भक्तपुर जिल्ला अदालत बार एशोसिएशनको आतिथ्यतामा भक्तपुरमा हुनेछ। सम्मेलनमा देशभरका सर्वोच्च अदालत, उच्च अदालत, जिल्ला अदालत, बार एशोसिएशन, कानुन व्यवसायी महिला समितिहरू तथा अन्य कानुन व्यवसायीहरूको सहभागिता रहने अपेक्षा गरिएको छ।

कार्यक्रमको पहिलो दिन चैत ६ गते भक्तपुरको ख्वप ब्यांकेट, नगरकोट रोडमा आयोजना हुनेछ भने दोस्रो दिन चैत ७ गते भक्तपुर जिल्ला अदालत को सभा कक्षमा कार्यक्रम सञ्चालन हुने जनाइएको छ। सम्मेलन बिहान ७:३० बजेबाट सुरु हुनेछ।

सम्मेलनमा महिला कानुन व्यवसायीहरूको प्रतिनिधित्व, न्यायिक क्षेत्रमा समावेशिता, नेतृत्वमा महिलाको भूमिका तथा न्यायपूर्ण समाज निर्माणका विषयमा छलफल हुने बताइएको छ।

एशोसिएशनका महासचिव केदार प्रसाद कोइरालाले देशभरका कानुन व्यवसायीहरूलाई सम्मेलनमा सहभागी हुन आह्वान गरेका छन्। सम्मेलनमा सहभागी हुनेहरूले अनिवार्य रूपमा कालो कोटसहित मर्यादित पोशाकमा उपस्थित हुनुपर्नेछ भने यातायात र आवासको व्यवस्था सहभागीले आफैं गर्नुपर्ने जनाइएको छ।

एशोसिएशनले सम्मेलनका लागि अनलाइन माध्यमबाट दर्ता गर्न सकिने जनाएको छ।