बालेन सरकार तातिँदा अदालतमा पनि गर्मागर्मी, रविको पासपोर्ट सम्बन्धी मुद्दासमेत पेशीमा चढ्यो

काठमाडौँ । जननिर्वाचित बालेन सरकारले विपक्षी पार्टीका नेताहरुलाई धमाधम पक्रेर मुद्दा चलाउन थालेपछि अदालतको सक्रियता पनि एकाएक बढेको छ । आपराधिक कार्यहरुको छिनोफानो गर्नुपर्ने अदालतमा राजनीतिक नेताका मुद्दाहरु आउन थालेपछि यसले अदालतप्रति राजनीतिक चासोसमेत बढाएको छ ।

आइतबार पक्राऊ परेका एमाले अध्यक्ष एवं पूर्वप्रधानमन्त्री केपी शर्मा ओलीको रिहाईको माग गर्दै उनकी श्रीमती राधिका शाक्यले दायर गरेको बन्दी प्रत्यक्षीकरणको रिटमाथि आज सुनुवाई हुँदैछ । यो रिट न्यायाधीश मेघराज पोखरेलको इजलासमा परेको छ ।

भदौ २३ को जेनजी आन्दोलनमा भएको गोलीकाण्डसम्बन्धी ज्यान मुद्दा लगाएर ओलीलाई आइतबार भक्तपुरको गुण्डुस्थित निवासबाट पक्राउ गरिएको हो । उनलाई त्रिवि शिक्षण अस्पतालमा राखिएको छ । पक्राऊ परेका ओलीलाई जिल्ला अदालत काठमाडौंले पाँच दिन थुनामा राखेर अनुसन्धान गर्न अनुमति दिएको छ ।

त्यसैगरी आइतबार नै पक्राऊ परेका पूर्वगृहमन्त्री रमेश लेखककी श्रीमती यशोदा लेखकले दायर गरेको बन्दी प्रत्यक्षीकरणको रिटमा पनि सर्वोच्च अदालतमा आजै सुनुवाई हुँदैछ । यो रिट न्यायाधीश कुमार रेग्मीको बेञ्चमा परेको छ ।

लेखकलाई पनि आइतबार जिल्ला अदालत काठमाडौंले पाँच दिन थुनामा राख्न अनुमति दिएको थियो ।

रविको पासपोर्टसम्बन्धी मुद्दा पनि पेशीमा

यसैवीच रास्वपा सभापति रवि लामिछानेविरुद्धको पासपोर्ट दुरुपयोगसम्बन्धी सर्वोच्चमा विचाराधीन मुद्दा पनि आज पेशीमा चढेको छ ।

युवराज पौडेलले दायर गरेको मुद्दा न्यायाधीश कुमार रेग्मी र मेघराज पोखरेलको संयुक्त इजलासमा परेको छ ।

उता, रवि लामिछानेको मुद्दा फिर्ता लिन महान्यायाधिवक्ताले गरेको निर्णयविरुद्ध परेको रिट पूर्ण इजलासमा गएको छ ।