महराविरुद्ध ७ करोड ७८ लाख बिगो मागदाबी, अख्तियारको आरोपपत्रमा के छ ?

काठमाडौँ । अख्तियार दुरुपयोग अनुसन्धान आयोगले पूर्वसभामुख कृष्णबहादुर महरा सहितविरुद्ध दायर गरेको भ्रष्टाचार मुद्दाको आरोपपत्रमा ‘भेप’मार्फत सुन तस्करीमा संगठित मिलेमतो र राज्य संयन्त्रकै दुरुपयोग भएको दाबी गरिएको छ ।

आयोगले विशेष अदालतमा दायर गरेको आरोपपत्रअनुसार त्रिभुवन अन्तर्राष्ट्रिय विमानस्थल भन्सार कार्यालयका कर्मचारी, विदेशी नागरिक तथा महरा पक्षबीच समन्वय गरी ठूलो परिमाणमा सुन नेपाल भित्र्याउने र त्यसलाई गैरकानुनी रूपमा बाहिर लैजाने योजना बनाइएको उल्लेख छ ।

अनुसन्धानबाट चिनियाँ नागरिक ली हाङ साङमार्फत ‘भेप’ (इलेक्ट्रोनिक चुरोट) भित्र सुन लुकाएर ल्याइएको पुष्टि भएको अख्तियारको दाबी छ । ती सामग्री एक्स–रे जाँचका क्रममा शंकास्पद देखिए पनि सम्बन्धित कर्मचारीले नियतवश पूर्ण जाँच नगरी पछि साटफेर गर्ने योजना बनाएको आरोपपत्रमा उल्लेख छ ।

अख्तियारका अनुसार भन्सार कार्यालयभित्रै मिलेमतोमा जफत गरिएको भनिएको सामान सुरक्षित नराखी गोदामबाट सुन निकालेर सुन नभएको ‘भेप’ राखिएको थियो । यसरी निकालिएको सुन बजारमा बिक्रीसमेत गरिएको आरोप छ ।

आरोपपत्रमा पूर्वसभामुख महराले आफ्ना छोरा राहुल महरा लगायतमार्फत भन्सारका उच्च अधिकारी र अन्य व्यक्तिहरूसँग बारम्बार सम्पर्क राख्दै उक्त तस्करी प्रक्रियामा प्रभाव पार्ने काम गरेको उल्लेख गरिएको छ ।

यस प्रकरणमा भन्सारका तत्कालीन प्रमुखसहित विभिन्न कर्मचारी, व्यापारी तथा विदेशी नागरिकसमेत संलग्न रहेको भन्दै अख्तियारले कुल करिब ७ करोड ७८ लाख रुपैयाँ बराबरको बिगो मागदाबी गरेको छ । सोही अनुसार कैद र जरिवानाको पनि मागदाबी गरिएको छ ।

हेर्नुहाेस् अख्तियारकाे आराेपपत्र –