लालीबजार चलचित्रको प्रतिबन्ध हट्यो

काठमाडौँ । उच्च अदालत पाटनले विवादास्पद नेपाली चलचित्र `लाली बजार` माथि लागेको अन्तरिम रुकावट फुकुवा गरिदिएको छ। अब यो फिल्म सिनेमा हलमा प्रदर्शन गर्न बाटो खुलेको छ।

उच्च अदालत पाटनका न्यायाधीश खडानन्द तिवारी र नेत्रप्रकाश आचार्यको संयुक्त इजलासले वैशाख २३ गते गरेको आदेशमा अल्पकालीन अन्तरिम आदेशलाई निरन्तरता दिनु नपर्ने ठहर गरेको हो।

रिट निवेदकले माग गरेको विषयवस्तुमा अन्तिम सुनुवाइमा विचार गर्न सकिने अवस्था देखिएकाले, हाल वैशाख १५ गते दिइएको अल्पकालीन अन्तरिम आदेशलाई निरन्तरता दिन आवश्यक नदेखिएको अदालतको ठहर छ।

रिट निवेदक(दर्ता नं:०८२ -WO-१७७ ) रोशनी नेपालीले फिल्ममा प्रयोग भएको केही शब्दावलीले राजसंस्था र राजाको सम्मानमा आँच पुर्‍याएको भन्दै प्रदर्शन रोक्न माग गरेकी थिइन्। तर अदालतले अहिलेका लागि त्यस्तो रोक आवश्यक नदेखेको जनाएको छ।

यो निर्णयसँगै सञ्चार तथा सूचना प्रविधि मन्त्रालयले यसअघि गरेको रोक्ने निर्णयको प्रभाव समाप्त भएको छ। अब फिल्मका निर्माताले जुनसुकै समयमा ‘लाली बजार’ रिलिज गर्न सक्नेछन्।

मुद्दाको अन्तिम सुनुवाइ भने बाँकी नै छ। तर अहिलेलाई फिल्म प्रदर्शनको बाटो खुलेसँगै दर्शकले यो फिल्म हलमा हेर्न पाउने सम्भावना बढेको छ।