राहदानी छपाइ अनियमिततासम्बन्धी भ्रष्टाचार : विशेष अदालतले भन्यो – आरजु राणा प्रतिवादी होइन

काठमाडौँ । विशेष अदालतले राहदानी छपाइ प्रक्रियामा भएको भनिएको अनियमिततासम्बन्धी भ्रष्टाचार मुद्दामा पूर्वपरराष्ट्रमन्त्री आरजु राणा देउवालाई प्रतिवादी नबनाइएको स्पष्ट पारेको छ ।

सोमबार विशेष अदालतले जारी गरेको सूचनामा उक्त मुद्दामा देउवासहित कुनै पनि राजनीतिक व्यक्तित्वलाई प्रतिवादी नबनाइएको उल्लेख गरिएको छ । मुद्दा दर्तापछि विभिन्न तहमा चर्चा र टिप्पणी हुन थालेपछि अदालतले यस्तो स्पष्टोक्ति दिएको हो ।

अख्तियार दुरुपयोग अनुसन्धान आयोगले राहदानी विभागका तत्कालीन महानिर्देशक तीर्थराज अर्यालसहित १८ जनाविरुद्ध विशेष अदालतमा भ्रष्टाचार मुद्दा दायर गरेको छ । उनीहरूमाथि राहदानी छपाइमा अनियमितता गरी सार्वजनिक सम्पत्तिलाई गैरकानूनी हानि पुर्‍याएको आरोप लगाइएको छ ।

मुद्दामा १० कर्मचारी, दुई विदेशी कम्पनी, चार विदेशी नागरिक तथा दुई नेपाली सहकर्मीलाई प्रतिवादी बनाइएको छ । आयोगले एक अर्ब १० करोड १३ लाख ४ हजार ६ सय ४७ रुपैयाँ १ पैसा बिगो कायम गरी कैद र जरिवानाको मागदाबी गरेको छ ।

विशेष अदालतका अनुसार आरोपपत्रसहित उपस्थित गराइएका प्रतिवादी तीर्थराज अर्याल, सुनिल कुमार केसी, तुल्सीप्रसाद आचार्य, राजाराम दाहाल, सोमेश थापा, विपिन प्रसाईँ र मणिन्द्रज अर्याललाई बयानका लागि मंगलबार अदालतमा उपस्थित गराउने गरी न्यायिक हिरासतमा पठाइएको छ ।

विशेष अदालतले सूचनाको अन्त्यमा ‘प्रस्तुत मुद्दामा पूर्वपरराष्ट्रमन्त्री आरजु देउवालगायत राजनीतिक व्यक्तित्वलाई प्रतिवादी बनाइएको छैन’ भन्ने उल्लेख गर्दै यस विषयमा स्पष्टोक्ति दिएको छ ।

सूचना हेर्नुहोस् :