विष्णु पौडेललाई ७ दिन हिरासतमा राख्न अनुमति

काठमाडौँ । सम्पत्ति शुद्धीकरण (मनी लाउन्डरिङ) मुद्दाको अनुसन्धानका क्रममा पक्राउ परेका विष्णु प्रसाद पौडेललाई थप ७ दिन न्यायिक हिरासतमा राखेर अनुसन्धान गर्न विशेष अदालतले अनुमति दिएको छ ।

सम्पत्ति शुद्धीकरण अनुसन्धान विभागको अनुरोधमा विशेष अदालतले सोमबार पहिलो पटक ७ दिनको म्याद थप गरेको अदालतकी सूचना अधिकारी पार्वती हितानले जस नेपाललाई जानकारी दिइन् । अदालतका सदस्य न्यायाधीश नारायणप्रसाद पौडेल, हेमन्त रावल र उमेश कोइरालाको इजलासले म्याद थपको आदेश दिएको विशेष अदालत प्रशासन शाखाले जनाएको छ ।

अदालतले जारी गरेको आदेशअनुसार अनुसन्धान प्रयोजनका लागि पौडेललाई न्यायिक हिरासतमा राखिएको छ । पौडेललाई आइतबार सुर्खेतबाट पक्राउ गरिएको थियो । अनुसन्धानको प्रारम्भिक चरणमा रहेको भन्दै विभागले थप २० दिन समय माग गरेकाे थियाे ।