शिक्षककै ‘सर्टिफिकेट’ नक्कली भेटिएपछि …

फाइल फाेटाे ।

काठमाडौँ । नक्कली शैक्षिक प्रमाणपत्र पेश गरेर माध्यमिक तहको शिक्षक पदमा नियुक्ति लिएको आरोपमा सिरहाको एक विद्यालयका शिक्षक गुन्जेश्वर मण्डलविरुद्ध अख्तियार दुरुपयोग अनुसन्धान आयोगले विशेष अदालतमा आरोपपत्र दायर गरेको छ ।

आयोगका प्रवक्ता सुरेश न्यौपानेका अनुसार, धनगढीमाई नगरपालिका स्थित जनता माध्यमिक विद्यालय, वेतहा भवानीपुरका मा.वि. तृतीय श्रेणीका शिक्षक गुन्जेश्वर मण्डलले नियुक्तिका बेला भारतको बिहार इन्टरमिडिएट एजुकेसन काउन्सिल, पटनाबाट आई.एससी. र चौधरी चरण सिंह विश्वविद्यालय, मेरठबाट विज्ञान विषयमा स्नातक तह उत्तीर्ण गरेको भनी झुट्टा प्रमाणपत्र पेस गरेको पाइएको छ ।

उजुरीका आधारमा अनुसन्धान गर्दा मण्डलले शैक्षिक योग्यताका प्रमाणपत्र नक्कली रहेको देखिएको आयोगले जनाएको छ । त्यसबाट उनले शिक्षक पदमा नियुक्ति, ओहदा, लाभ र सुविधासमेत प्राप्त गरेको आयोगको आरोप छ ।

आयोगले मण्डललाई भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुरमा कैद र जरिवाना सजायको मागदाबी लिई आज बुधबार विशेष अदालत काठमाडौँमा आरोपपत्र दायर गरेको छ ।

हेर्नुहोस् विज्ञप्ति –