तासमा चिप र आँखामा लेन्स लगाएर क्यासिनो ठगी गर्ने गिरोह पक्राउ

काठमाडाैं । प्रहरीले नेपालमा क्यासिनो इभेन्ट गरि तासमा चिप र आँखामा बिशेष प्रकारको लेन्स लगाई ठगी गर्ने गिरोहलाई पक्राउ गरेको छ ।

जिल्ला प्रहरी परिसर, काठमाडौंले बुधबार पत्रकार सम्मेलन गर्दैै काठमाडौंको ठमेलस्थित छाया सेन्टरको वाल्डो क्यासिनोमा इभेन्ट नै आयोजना गरि तासमा चिप र आँखामा बिशेष प्रकारको लेन्स लगाई ठगी गर्ने गिरोहलाई पक्राउ गरिएको जनाएको हो । पक्राउ पर्नेमा सुरेश महाजन, दिनेश बर्मा, बिक्रम सिंह , प्रमोद मौर्य, चिजा खड्का र भवानी पाण्डे रहेका छन् भने क्यासिनो संचालक, विनोद भन्ने जनार्दन उप्रेती, गौरब खत्री, मोनु भन्ने निरज कुमार, हिरा शेखर मल्ली पुरी, कमल खरबन्दा र मुकेश भनिने व्यक्ति फरार रहेको काठमाडौं प्रहरी परिसरका प्रवक्ता एसपी पवन कुमार भट्टराईले जानकारी दिए ।

डिसेम्बर ११ देखि १४ तारेखसम्म भारत र नेपालका बिभिन्न समूह मिलेर क्यासिनो इभेन्ट आयोजना गरेका थिए । महाकाय समूहका मुख्य व्यक्ति सुरेश महाजनले नक्कली खेलाडीको व्यवस्थापन गरेको र चिप जडित ताज र बिशेष प्रकारको लेन्सको जोहो गरेको भट्टराईले बताए । ठगी गर्नैका लागि ५० प्याकेट म्याग्नेट जटित तास र ४ सय लेन्स भारतबाट खरिद गरेर ल्याइएको पाइएको उनले जानकारी दिए । आँखामा बिशेष प्रकारको लेन्स लगाएपछि तासको दुवैतर्फ देखिने र अन्य खेलाडीलाई ठगी गर्ने स्पष्ट नियत देखिएको उनको भनाइ छ ।

ठगी गरेर जितेको रकमको ९० प्रतिशत इभेन्ट सञ्चालकले र बाँकी १० प्रतिशत खेलाडीले पाउने गरि ईभेण्ट सञ्चालक सुरेश माहाजन र दिनेश बर्मा बिच सहमति भएको समेत अनुसन्धानबाट खुलेको छ । पक्राउ परेका व्यक्तिका साथबाट प्रहरीले नेपाली र भारतीय रुपैया, चिज जडित तास, लेन्स, हवाइ टिकट लगाएत बरामद गरेको छ । वाल्डो क्यासिनोले समेत कानून उलंघन गरेको देखिएकाले पर्यटन बिभागसंग समन्वय गरेर आवश्यक कारवाही अघि बढाइने प्रहरीले जनाएको छ ।

भिडियाे पनि हेर्नुहाेस्: