कम्बोडिया पठाइदिने भन्दै ४ लाख बढी ठग्ने लामा पक्राउ

काठमाडौँ । वैदेशिक रोजगारीका लागि कम्बोडिया पठाइदिने भन्दै ठगी गरेको आरोपमा एक व्यक्तिलाई प्रहरीले पक्राउ गरेको छ ।

काठमाडौँ उपत्यका अपराध अनुसन्धान कार्यालय, टेकुका अनुसार कम्बोडिया लैजाने प्रलोभन देखाई लामो समयसम्म झुक्याएर पीडितबाट रकम असुली गरी सम्पर्कविहीन बनेको उजुरीका आधारमा विकिलाल लामालाई पक्राउ गरिएको हो ।

पक्राउ परेका लामा पर्सा जिल्ला ठोरी गाउँपालिका–४ का स्थायी बासिन्दा हुन् । हाल उनी काठमाडौँ महानगरपालिका–९ मा बसोबास गर्दै आएका थिए । प्रहरीका अनुसार उनले ४ लाख ३५ हजार रुपैयाँ ठगी गरेको पाइएको जनाएको छ ।

काठमाडौँ महानगरपालिका–३ बाट पक्राउ गरिएका लामालाई थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ । ठगीबाट पीडित हुनेको संख्या १ जना रहेको विज्ञप्तिमा उल्लेख छ ।

प्रहरीले वैदेशिक रोजगारीका नाममा हुने यस्ता ठगीप्रति सचेत रहनसमेत सर्वसाधारणलाई आग्रह गरेको छ ।