डीएसपी उमाशंकर यादवको नियति : असारमा सम्मान, फागुनमा छानबिन

काठमाडौँ । आफ्नो नाता पर्नेहरूलाई निर्वाचन प्रहरीका रूपमा भर्ना गराएर तालिम नदिई ड्युटीमा पनि परिचालन नगरी सेवा–सुविधा दिएको आरोप लागेपछि जिल्ला प्रहरी कार्यालय रुकुम पूर्वका डीएसपी उमाशंकर प्रसाद यादवमाथि छानबिन सुरु गरिएको छ ।

छानबिनका लागि उनलाई रुकुम पूर्वको जिम्मेवारीबाट हटाएर लुम्बिनी प्रदेश प्रहरी कार्यालयमा हाजिर गराइएको छ । प्रदेश प्रहरी कार्यालयले घटनाको सत्यतथ्य पत्ता लगाउन एसपी पुष्प मल्लको नेतृत्वमा छानबिन समिति गठन गरेको जनाएको छ ।

लुम्बिनी प्रदेश प्रहरी कार्यालयका डीआईजी भूपेन्द्र खत्रीका अनुसार छानबिन प्रक्रिया जारी रहेकाले डीएसपी यादवलाई अस्थायी रूपमा जिल्लाबाट प्रदेश कार्यालयमा झिकाइएको हो ।

गत फागुन २१ गते सम्पन्न प्रतिनिधिसभा सदस्य निर्वाचनका क्रममा भर्ना गरिएका तीन जना निर्वाचन प्रहरीलाई लिएर विवाद उत्पन्न भएपछि घटनाबारे अनुसन्धान सुरु गरिएको हो । ती प्रहरीहरूलाई भर्ना गरिए पनि तालिम नदिइएको र ड्युटीमा समेत नखटाइएको भन्दै उनीहरूले विरोध जनाएपछि विषय सार्वजनिक भएको बताइएको छ ।

हाल रुकुम पूर्वमा डीएसपी केशव ज्ञवालीलाई पठाइएको छ । उनी यसअघि लुम्बिनी प्रदेश प्रहरी कार्यालयमा कार्यरत थिए । डीएसपी यादव भने बाराका स्थानीय हुन् ।

प्राथमिक जानकारीअनुसार यादवले आफ्नै नातासम्बन्ध पर्ने व्यक्तिहरूलाई बाराबाट रुकुम पूर्व बोलाएर निर्वाचन प्रहरीमा भर्ना गरेको र उनीहरूलाई नियमित प्रक्रिया अनुसार परिचालन नगरेको आरोप लागेको छ ।

यसअघि २०८२ असार अन्तिमतिर डीएसपी यादवलाई इमान्दारीपूर्वक कार्यसम्पादन गरेको भन्दै प्रदेश प्रहरीले सम्मानसमेत गरेको थियो ।