ओलीको गिरफ्तारीविरुद्ध एमाले सर्वोच्च जाने

काठमाडौँ । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीको गिरफ्तारीविरुद्ध नेकपा एमाले सर्वोच्च अदालत जाने भएको छ । गैरकानूनी ढंगले प्रतिशोधपूर्णरुपमा पक्राउ गरिएको भन्दै त्यसलाई रोक्न एमालेले सर्वोच्च अदालतमा रिट लैजाने तयारी गरेको हो ।

शनिबार बिहान प्रहरीले गुण्डुस्थित निवासबाटै अध्यक्ष ओलीलाई पक्राउ गरेपछि नेकपा एमालेका नेता कार्यकर्ताहरु शनिबार बिहानैदेखि ललितपुरको च्यासलस्थित केन्द्रीय कार्यालयमा भेला भएका छन् । त्यहाँ कानूनविदहरुको टोली पनि पुगेको छ । कानूनविदहरुले गिरफ्तारीविरुद्ध कसरी कानूनी लडाइँमा जाने भनेर तयारी गरिरहेको स्रोतले बतायो ।ओलीको गिरफ्तारीविरुद्ध सर्वोच्च अदालत जाने तयारी भइरहेको स्रोतले बतायो ।

प्रहरीले ओलीलाई शनिबार बिहान गिरफ्तार गरेको हुनाले आज अदालत विदाको दिन अदालत बन्द रहन्छ । त्यस्र्थ भोलि आइतबार एमालेले सर्वोच्चमा निवेदन दिने एमाले निकट स्रोतको भनाइ छ ।

प्रहरीले भदौ २३ को घटनामा १९ जनाको ज्यान जाने गरी गोली चलाएको आरोपमा शनिबार बिहान केपी शर्मा ओली र रमेश लेखकलाई पक्राउ गरेपछि नेपालको राजनीति तरंगित बनेको छ ।

काठमाडौंमा बिहानैदेखि प्रहरीको बाक्लो परिचालन गरिएको छ ।

यता, बिहानैदेखि पानीसमेत परिरहेको छ ।

केपी ओली र रमेश लेखक पक्राउ, ज्यानमुद्दा चलाइने