प्रधानन्यायाधीश सिफारिस विरुद्धको रिट दर्ता गर्न प्रशासनको आनाकानी, कामु प्रधानन्यायाधीशले देखाइन् चासो

काठमाडौँ । संवैधानिक परिषद्को निर्णय विरुद्ध पेस भएको रिट दर्ता गर्ने सर्वोच्च प्रशासनले आनाकानी गरेको पाइएको छ ।

बिहीबार बसेको संवैधानिक परिषद्को बैठकले वरियता मिचेर डा. मनोज शर्माको नाम सिफारिस गरेको थियो । परिषद्ले परम्परा मिचेर चौथो वरियताका व्यक्तिलाई प्रधानन्यायाधीश सिफारिस गरेको भन्दै न्याय क्षेत्रमा चर्को विरोध भइरहेको छ ।

यसैका विरुद्धमा वरिष्ठ अधिवक्ता दिनेश त्रिपाठी र अधिवक्ता पूर्ण केसीले रिट निवेदन पेस गरेका थिए । सोही रिट निवेदन दर्ता गर्ने सर्वोच्च प्रशासनले आनाकानी गरेको पाइएको हाे । प्रशासनबाट रिट दर्तामा आनाकानी गरेको पाइएपछि कामु प्रधानन्यायाधीश सपना प्रधान मल्लले यस प्रति चासो व्यक्त गर्दै दर्ता नहुनुपर्ने कारण के हो भनी बुझ्न सर्वोच्च पुगेको पाइएको हो ।

परिषद्ले वरियता मिचेपछि असन्तुष्टि जनाउँदै कामु प्रधानन्यायाधीश मल्लले आज शुक्रवारको इजलास बहिस्कार गरेकी थिइन् ।