मोदीविरुद्ध ट्विट गर्ने महिला प्रोफेसरलाई मुद्दा

 वाराणसी। भारतीय प्रधानमन्त्री नरेन्द्र मोदी, उत्तर प्रदेशका मुख्यमन्त्री योगी आदित्यनाथ र भारतका अन्य राजनीतिक नेताहरू विरुद्ध सामाजिक सञ्जालमा पोस्ट गरेकोमा शिक्षाविद् तथा लेखक प्रोफेसर मधु किश्वर विरुद्ध फौजदारी कारबाही सुरु गर्न वाराणसीको एक अदालतमा उजुरी परेको छ।

प्रोफेसर मधु किश्वर विरुद्ध भारतीय जनता पार्टी (भाजपा) को कानूनी एकाइका संयोजक अधिवक्ता शशांक शेखर त्रिपाठीले मुद्दा दायर गरेका हुन् ।

वाराणसीको मुख्य न्यायिक मजिस्ट्रेट अदालतले किश्वर विरुद्ध मानहानिपूर्ण पोस्टहरूका लागि पहिलो सूचना रिपोर्ट (एफआईआर) दर्ता गर्न प्रहरीलाई निर्देशन दिन माग गरिएको उजुरीमाथि सुनुवाइ गरेको छ।

अदालतले मुद्दालाई ‘विविध मुद्दा’ अन्तर्गत दर्ता गरेको छ । अदालतले यस विषयमा प्रहरीबाट प्रतिवेदनसमेत मागेको छ ।

उजुरीमा किश्वरले X (पहिले ट्विटर) र अन्य डिजिटल प्लेटफर्महरूमा रहेको आफ्नो प्रमाणित सामाजिक सञ्जाल खाताको दुरुपयोग गरी भ्रामक, झूटा, उत्तेजक र मानहानिपूर्ण सामग्री निरन्तर प्रसारण गरेको आरोप  लगाइएको छ।

उजुरीमा किश्वरले प्रधानमन्त्री र अन्य संवैधानिक पदाधिकारीहरू विरुद्ध गरेका केही पोस्टहरू अत्यधिक भ्रामक रहेको र यसको व्यापक सामाजिक प्रभाव पर्न सक्‍ने दाबी गरिएको छ ।

किश्वरले प्रमाणित सामाजिक सञ्जाल खाता चलाउने भएकाले उनका बयानहरू जनताले बढी विश्वसनीय मान्ने सम्भावना रहेको र त्यसले गर्दा तिनीहरूको प्रभाव र गम्भीरता बढेको तर्क पनि उजुरीमा गरिएको छ।

यो मुद्दाको सुनुवाइ अदालतले अप्रिल १५ मा गर्नेछ । त्यतिन्जेलसम्म प्रहरीले आफ्नो प्रतिवेदन बुझाउने अपेक्षा गरिएको छ ।

स्रोत : बार एण्ड बेन्च