सर्वोच्च अदालतमा एकैदिन ७०० पेसी, ३१० मुद्दामा फैसला

काठमाडौँ । सर्वोच्च अदालतमा मंगलबार एकैदिन ७०० वटा मुद्दाको पेसी तोकिँदा ३१० वटा मुद्दामा फैसला भएको छ ।

अदालत प्रशासनका अनुसार आज ४० वटा आदेश जारी भएका छन् भने १९७ वटा मुद्दा स्थगित भएका छन् । त्यसैगरी १४१ वटा मुद्दा हेर्न नभ्याइने र १२ वटा मुद्दा हेर्न नमिल्ने सूचीमा परेका छन् ।

आज सर्वोच्च अदालतमा ११ वटा इजलास सञ्चालनमा रहेका थिए । तीमध्ये एउटा पूर्ण इजलास र बाँकी एकल तथा संयुक्त इजलासबाट मुद्दाको सुनुवाइ गरिएको थियो ।

सर्वोच्च अदालतको दैनिक तथ्यांकअनुसार आज कुल पेसीमध्ये ३१० मुद्दाको अन्तिम टुंगो लाग्दा बाँकी मुद्दा आदेश, स्थगित तथा अन्य कारणले निष्कर्षमा पुग्न सकेनन् ।