चिकित्सकमाथि कुटपिटपछि देशभर स्वास्थ्य सेवा ठप्प, मानव अधिकार आयोगले भन्यो- अत्यावश्यक सेवा सुचारु गर

काठमाडौँ  । नारायणी अस्पताल वीरगञ्जका चिकित्सक डा. प्रमोद राममाथि भएको कुटपिट र अस्पताल तोडफोडको विरोधमा चिकित्सक तथा स्वास्थ्यकर्मीहरूले आज देशभर नियमित स्वास्थ्य सेवा बन्द गर्दा नागरिकको स्वास्थ्य अधिकार प्रभावित भएको भन्दै राष्ट्रिय मानव अधिकार आयोगले गम्भीर ध्यानाकर्षण जनाएको छ ।

आयोगले स्थलगत अनुगमन गरेर जारी गरेको प्रेस विज्ञप्तिमा स्वास्थ्यकर्मीमाथि हिंसा र अस्पताल तोडफोडलाई निन्दनीय कार्य बताउँदै यसले अराजकतालाई प्रश्रय दिने र कानूनको शासनमा चुनौती खडा गर्ने उल्लेख गरेको छ । घटनापछि आकस्मिकबाहेकका सेवा बन्द गर्दा बिरामीहरू उपचारबाट वञ्चित भएको आयोगले जनाएको छ ।

स्वास्थ्य सेवा जस्तो अत्यावश्यक सेवा बन्द गर्नु संविधानको धारा ३५ ले प्रत्याभूत गरेको स्वास्थ्यसम्बन्धी मौलिक हक र उपभोक्ता अधिकार विपरीत भएको आयोगको ठहर छ । यसबाट आम नागरिकको स्वास्थ्य अधिकार कुण्ठित भएको भन्दै आयोगले नेपाल सरकारलाई घटनाको सत्यतथ्य छानबिन गरी दोषीलाई कानुनी कारबाहीको दायरामा ल्याउन निर्देशन दिएको छ ।

साथै, आयोगले स्वास्थ्य सेवा सुचारु गर्न, विरोध जनाउँदा नागरिकको स्वास्थ्यमा असर नपर्ने वैकल्पिक उपाय अपनाउन र वार्तामार्फत समस्या समाधान खोज्न नेपाल सरकार, आन्दोलनरत चिकित्सक, मृतक परिवार तथा सबै पक्षलाई आग्रह गरेको छ । 

हेर्नुहोस् विज्ञप्ति –