किशोर श्रेष्ठमाथिको अनुसन्धान जारी, हिरासत अवधि थपियो

काठमाडौँ । जनआस्था साप्ताहिकका सम्पादक किशोर श्रेष्ठमाथि प्रहरीले गरिरहेको अनुसन्धानका लागि काठमाडौँ जिल्ला अदालतले थप चार दिनको हिरासत अनुमति दिएको छ ।

श्रेष्ठलाई यसअघि तीन दिन हिरासतमा राख्न अदालतबाट अनुमति लिइएको थियो । सो अवधि पूरा भएपछि प्रहरीले अनुसन्धानका लागि थप समय आवश्यक रहेको जनाउँदै अदालतसमक्ष म्याद थपको माग गरेको थियो । अदालतले प्रहरीको मागअनुसार थप चार दिन हिरासतमा राख्न अनुमति दिएको हो ।

श्रेष्ठमाथि वैयक्तिक गोपनीयतासम्बन्धी ऐन, २०७५ अन्तर्गतको कसुरमा अनुसन्धान भइरहेको प्रहरीले जनाएको छ । उनलाई उपत्यका अपराध अनुसन्धान कार्यालय र जिल्ला प्रहरी परिसर काठमाडौँको संयुक्त टोलीले गत बुधबार पक्राउ गरेको थियो ।

यता, श्रेष्ठको पक्राउविरुद्ध सर्वोच्च अदालतमा दायर बन्दी प्रत्यक्षीकरणको रिटमाथि पनि सोमबार सुनुवाइ हुँदैछ । न्यायाधीशद्वय नहकुल सुवेदी र बालकृष्ण ढकालको संयुक्त इजलासमा रिटको पेसी तोकिएको छ ।