वैवाहिक बलात्कार मुद्दामा न्यायाधीश भुवन गिरीलाई सर्वोच्चबाट पूर्ण सफाइ

काठमाडौँ । वैवाहिक बलात्कारको आरोप लागेका दार्चुला जिल्ला अदालतका न्यायाधीश भुवन गिरीले अन्ततः सर्वोच्च अदालतबाट पनि सफाइ पाएका छन् । 

मंगलबार न्यायाधीशद्वय विनोद शर्मा र बालकृष्ण ढकालको इजलासले उच्च अदालत पाटनले दिएको सफाइको फैसलालाई सदर गर्दै गिरीलाई पूर्ण रूपमा मुक्त गरेको हो । यो निर्णयसँगै न्यायाधीश गिरीमाथि लागेको बलात्कारको आरोप औपचारिक रूपमा खारेज भएको छ ।

पूर्वपत्नी आरती रावल गिरीले सहमतिबिना शारीरिक सम्बन्ध राखेको र जबर्जस्ती करणी गरेको आरोप लगाउँदै मुद्दा दायर गरेकी थिइन् । उक्त मुद्दामा जिल्ला अदालत काठमाडौंले २०८१ जेठमा गिरीलाई दोषी ठहर गर्दै सात वर्ष कैद र तीन लाख रुपैयाँ जरिवाना सुनाएको थियो । 

तर जिल्ला अदालतको फैसलाविरुद्ध गिरीले उच्च अदालत पाटनमा पुनरावेदन गरेपछि ३१ चैत २०८१ मा उच्च अदालतले उनलाई सफाइ दिएको थियो ।

उच्च अदालतको उक्त फैसलाविरुद्ध परेको पुनरावेदनमाथि सुनुवाइ गर्दै सर्वोच्च अदालतले मंगलबार उच्चको फैसलालाई सदर गरेको हो ।

मुद्दाको क्रममा न्यायाधीश गिरी पटक-पटक धरौटीमा छुटे पनि एक चरणमा सर्वोच्चले थुनामा राख्न आदेश दिएको थियो ।

पूर्वपत्नीले बहसका क्रममा  इजलासमै विष सेवन गरेपछि अदालतले मुद्दालाई थुनामा राखेर हेर्ने निर्णय गरेको थियो ।