टिकटकर अधिकारीलाई पुर्पक्षका लागि थुनामा पठाउन ललितपुर अदालतको आदेश

काठमाडौँ ।  ठगी, संगठित अपराध र सम्पत्ति शुद्धीकरण मुद्दामा टिकटकर तुल्सा अधिकारीलाई ललितपुर जिल्ला अदालतले पुर्पक्षका लागि थुनामा पठाउने आदेश दिएको छ ।

ललितपुर जिल्ला अदालतका न्यायाधीश टेकनाथ गौतमको इजलासले मंगलबार तुल्सा अधिकारीलाई थुनामा राख्ने निर्णय गरेको हो । अदालतले उनलाई आपराधिक लाभ (एक्सटर्सन), संगठित अपराध र सम्पत्ति शुद्धीकरण (मनी लाउन्डरिङ) समेतको कसुरमा थुनामा पठाएको छ ।

मुद्धा नं ०८२-C१-०९८४ (४०-०८२-०५२३१) अन्तर्गत २०८२ साल चैत्र १९ मा दर्ता भएअनुसार तुल्सालाई थुनामा राखेर मुद्दाको पुर्पक्ष गर्नुपर्ने आदेश दिइएको हाे ।

प्रहरीले इन्टरपोलको सहयोगमा गत शनिबार उनलाई थाइल्यान्डबाट पक्राउ गरी नेपाल ल्याएको थियो । उनी पछिल्लो समय चीनमा बस्दै आएकी थिइन् ।

कुमार चिमोरियाको जाहेरीका आधारमा उनलाई ६ करोड ५२ लाख २९ हजार ७५ रुपैयाँ ठगी गरेको आरोप छ । प्रहरी अनुसन्धानका क्रममा उनी सम्पत्ति शुद्धीकरण मुद्दामा पनि जोडिएकी थिइन् । यसअघि प्रहरी वृत्त सातदोबाटोमा दायर जाहेरीमा आपराधिक विश्वासघात र ठगीको उल्लेख थियो ।

अदालतको आज बिहिवारकाे आदेशसँगै तुल्सा अधिकारी अब थुनामा रहेर मुद्दाको पुर्पक्ष गर्नुपर्ने भएको छ। उक्त्र मुद्धामा अशोक कुमार अग्रवालसहित अन्य १० जनाविरुद्ध जाहेरी परेको छ।