संविधानविपरीत मधेस सरकार गठनको आरोप, सर्वोच्चमा सुनुवाइ

काठमाडाैं । मधेस प्रदेश सरकार गठनविरुद्ध दायर रिटमाथि सुनुवाइका लागि सर्वोच्च अदालतले पेसी तोकेको छ । मंगलबार न्यायाधीश टेकप्रसाद ढुङ्गानाको एकल इजलासमा दुईवटा रिट सुनुवाइका लागि सूचीबद्ध भएका छन् ।

रकीप्रसाद साह र अर्जुन साहले संविधानको धारा १६८ को उपधारा ३ बमोजिम गठन गरिएको मधेस प्रदेश सरकार असंवैधानिक भएको दाबी गर्दै रिट दायर गरेका हुन् । उनीहरूले संविधानको धारा १३३ अनुसार उत्प्रेषण रिट जारी गरी प्रदेश प्रमुखद्वारा गरिएको मुख्यमन्त्री नियुक्ति बदर गर्न माग गरेका छन् ।

दुवै रिटमा मधेस प्रदेश प्रमुखको कार्यालय, मुख्यमन्त्रीको कार्यालय र मधेस प्रदेश सभालाई विपक्षी बनाइएको छ ।