अमेरिका पठाइदिने भन्दै १० लाख ठगी गर्ने दुई जना पक्राउ

काठमाडाैँ । अमेरिका पठाइदिने प्रलोभन देखाएर ठगी गरेको आरोपमा प्रहरीले दुई जनालाई पक्राउ गरेको छ ।

काठमाडौँ उपत्यका अपराध अनुसन्धान कार्यालय, टेकुका अनुसार वैदेशिक रोजगारीका नाममा पीडितबाट रकम असुली गरी विदेश नपठाएको उजुरीपछि बिना महर्जन र विन्दा महर्जनलाई आइतबार काठमाडौँ महानगरपालिका–११ बाट पक्राउ गरिएको हो ।

प्रहरीका अनुसार उनीहरूले अमेरिका पठाइदिने भन्दै एक जना पीडितबाट करिब १० लाख रुपैयाँ लिएको प्रारम्भिक अनुसन्धानमा खुलेको छ । पक्राउ परेका दुवै जनाकै स्थायी ठेगाना काठमाडौँको कीर्तिपुर नगरपालिका–२ रहेको जनाइएको छ ।

उनीहरूलाई थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।