रास्वपाले छान्यो समानुपातिक सांसद, ८४ प्रतिशत महिला

काठमाडौँ । प्रतिनिधि सभा सदस्य निर्वाचनमा पहिलो दल बनेको राष्ट्रिय स्वतन्त्र पार्टी (रास्वपा) ले समानुपातिक कोटाबाट सांसद्‌ बन्ने ५७ जनाको नाम टुङ्ग्याएको छ । छानिएकाको नाम रास्वपाले आजै निर्वाचन आयोगमा पठाउँदैछ ।

उक्त पार्टीका प्रवक्ता मनिष झाले जानकारी दिएअनुसार; रास्वपाले जितेको समानुपातिकतर्फको ५७ सिटमा महिलामात्रै ४८ जना पठाउँदैछ । यो सङ्ख्या रास्वपाको समानुपातिक सिटको ८४ प्रतिशतभन्दा बढी हो ।

आज बसेको पार्टी सचिवालय बैठकले समानुपातिकमा पुरुषतर्फ नौ जनाको नाममात्रै आयोगमा पठाउने निर्णय गरेको झाले बताएका छन्‌ । उनका अनुसार; कानूनले तोकेबमोजिमका क्लष्टरमध्ये खसआर्यबाट १७, जनजातिबाट १६, मुस्लिमबाट तीन, दलितबाट आठ, मधेसीबाट नौ र थारु समुदायबाट चारजनाको नाम पठाउन लागिएको हो ।

निर्वाचन आयोगमा औपचारिक प्रक्रिया पूरा भएपछि समानुपातिक सा‌ंसद्‌ निम्ति सिफारिस भएकाहरूको नाम सार्वजनिक गरिने झाले बताएका छन्‌ ।