लक्जेम्बर्गका नागरिकको आवासीय भिसा अमेरिकी नागरिकको नाममा गराएको आरोपमा मुद्दा दायर 

काठमाडौँ । अध्यागमन विभागको प्रणाली दुरुपयोग गरी लक्जेम्बर्गका नागरिकको आवासीय भिसा अमेरिकी नागरिकको नाममा एकीकृत गरी भिसा प्रिन्ट र राहदानीमा टाँस्ने काम भएको भन्दै अख्तियार दुरुपयोग अनुसन्धान आयोगले दुई जनाविरुद्ध विशेष अदालतमा आरोपपत्र दायर गरेको छ।

अख्तियारको प्रेस विज्ञप्तिअनुसार अध्यागमन विभाग गैरपर्यटक शाखाका तत्कालीन कम्प्युटर अपरेटर राजिव महतो र अमेरिकी नागरिक डिन जे रोबिन्सनविरुद्ध भ्रष्टाचार निवारण ऐन, २०५९ बमोजिमको कसुरमा आरोपपत्र दायर गरिएको हो।

अनुसन्धानबाट देखिएअनुसार महतोले नेपाली पोर्ट प्रणालीमा रहेको ट्रयाभलर सेन्ट्रलाइजेसन सुविधा दुरुपयोग गरेका थिए। मिति २०८० फाल्गुन ९ मा लक्जेम्बर्गका नागरिक पल क्रिस्चियन पियर गेडिट्जका नाममा जारी भएको आवासीय भिसासम्बन्धी सम्पूर्ण अभिलेख अमेरिकी नागरिक डिन जे रोबिन्सनका नाममा एकीकृत गरिएको थियो। कानूनबमोजिम प्रक्रिया पूरा नगरिएको, अधिकारप्राप्त अधिकारीबाट निर्णय नभएको र तोकिएको राजस्वसमेत दाखिला नगरिएको अवस्थामा उक्त भिसा प्रिन्ट गरी रोबिन्सनको राहदानीमा टाँसिएको थियो। सोही राहदानीको आधारमा रोबिन्सन नेपालमा बसोबास गरेको समेत देखिएको छ।

अख्तियारले महतोको कार्यलाई भ्रष्टाचार निवारण ऐनको दफा ९ र ११ बमोजिमको कसुर मानेको छ भने रोबिन्सनलाई मुख्य कसुरदारको मतियारका रूपमा दफा २२ को प्रतिबन्धात्मक वाक्यांशअन्तर्गत मुख्य कसुरदारसरह कैद र जरिबानाको सजाय मागदाबी लिई आरोपपत्र दायर गरिएको छ।

हेर्नुहोस् विज्ञप्ति –