सडकमा माटो खसालेर हिलाम्मे बनाउने कन्स्ट्रक्सनलाई ५० हजार जरिवाना

काठमाडौं । काठमाडौं महानगरपालिका–२, गैरीधारा क्षेत्रमा निर्माणाधीन घरबाट सडकमा माटो खसालेर सडक हिलाम्मे बनाउने राम कन्स्ट्रक्सनलाई महानगर प्रहरीले ५० हजार रुपैयाँ जरिवाना गरेको छ ।

निर्माणका क्रममा सडकमा जथाभावी माटो खसाल्दा पैदलयात्री तथा सवारीसाधनको आवतजावतमा समस्या भएको गुनासो आएपछि महानगर प्रहरी बलले निर्माण कम्पनीमाथि कारबाही गरेको हो ।

सडकमा खसालिएको माटोका कारण अत्यधिक हिलो हुनुका साथै सडकको आवागमन प्रभावित भएको र दुर्घटनाको जोखिमसमेत बढेको महानगर प्रहरीले जनाएको छ । निर्माणस्थलबाट सडकमा माटो तथा अन्य सामग्री खसालेर सार्वजनिक आवागमनमा अवरोध पुर्‍याएको भन्दै महानगरले जरिवाना असुल गरेको हो ।

महानगर प्रहरीले प्रशासनिक दण्ड, जरिवाना र जफत शीर्षकअन्तर्गत निर्माण कम्पनीबाट ५० हजार रुपैयाँ जरिवाना असुल गरेको रसिदमा उल्लेख छ ।