‘निजी जमिनमा धार्मिक गतिविधि गर्न बाधा नपुर्‍याउनू’

भारत । भारतको इलहावाद उच्च न्यायालयले उत्तर प्रदेशका अधिकारीहरूलाई निजी जग्गामा रहेका मस्जिदभित्र नमाज पढ्दा बाधा गर्न रोक लगाएको छ । अदालतले कसैको निजी जमिनमा हुने नमाजमा हस्तक्षेप नगर्न सरकारलाई निर्देशन दिएको हो ।

न्यायाधीशद्वय शेखर बी. सराफ र विवेक सरनको डिभिजन बेञ्चले निजी परिसरमा धार्मिक प्रार्थना सभा आयोजना गर्न कुनै कानूनी रोक नभएको जनाएको हो ।

अदालतमा परेको एक रिट निवेदनमाथि यो आदेश जारी भएको भारतको बारएण्डबेञ्चमा उल्लेख छ । रिट निवेदकले वक्फ मस्जिद रजा नामक मस्जिदमा शान्तिपूर्वक नमाज पढ्ने क्रममा कुनै पनि प्रकारका हस्तक्षेप गर्न रोक लगाउनुपर्ने माग गरेका थिए । उक्त मस्जिद निजी परिसरमा रहेको छ ।

सार्वजनिक सडक या स्थानमा कानून उल्लङ्घन हुनेगरी त्यस्ता प्रार्थना भएको खण्डमा भने प्रहरीले कानूनबमोजिम उपयुक्त कारबाही गर्न सक्ने अदालतले स्पष्ट पारेको छ ।