वैदेशिक रोजगारी ठगी मुद्दामा कैद तोकिएकी १८ वर्षीया युवती पक्राउ

काठमाडौं । वैदेशिक रोजगारी ठगी मुद्दामा अदालतबाट एक वर्ष छ महिना कैद र एक लाख ४५ हजार रुपैयाँ जरिवाना तोकिएकी १८ वर्षीया रोशना चापागाईंलाई प्रहरीले पक्राउ गरेको छ ।

काठमाडौं उपत्यका अपराध अनुसन्धान कार्यालयका अनुसार चापागाईंलाई भक्तपुर जिल्लाको मध्यपुर थिमि नगरपालिका वडा नं ५ कमेरोटारस्थित आफ्नै घरबाट २०८१ असोज १९ गते पक्राउ गरिएको हो । अदालतको फैसला भएपछि फरार रहेकी उनलाई गोप्य सूचनाको आधारमा खोजतलास गरी पक्राउ गरिएको प्रहरीले जनाएको छ ।

काठमाडौं जिल्ला अदालतले २०८१ वैशाख ३० गते वैदेशिक रोजगारी ठगीसम्बन्धी मुद्दामा रोशना चापागाईंलाई दोषी ठहर गर्दै उक्त सजाय सुनाएको थियो । नेपाल सरकारका तर्फबाट जिल्ला सरकारी वकिल कार्यालयले दायर गरेको उक्त मुद्दामा अदालतले फैसला कार्यान्वयनका लागि उनलाई पक्राउ गरी उपस्थित गराउन निर्देशन दिएको थियो ।

पक्राउपछि रोशनालाई फैसला कार्यान्वयनका लागि काठमाडौं जिल्ला अदालतमा उपस्थित गराइएको छ ।

काठमाडौं उपत्यका अपराध अनुसन्धान कार्यालयले वैदेशिक रोजगारीको प्रलोभन देखाएर ठगी गर्ने व्यक्तिहरूविरुद्ध निरन्तर अनुसन्धान र खोजी अभियान सञ्चालन गर्दै आएको जानकारी दिएको छ ।