चुनाव लाग्यो ! आजदेखि समानुपातिकको बन्दसूची पेस हुँदै

काठमाडौं । फागुन २१ का लागि तोकिएको प्रतिनिधिसभा निर्वाचनको कार्यतालिका आइतबारदेखि औपचारिकरुपमा कार्यान्वयनमा आएको छ ।

आयोगले तोकेको कार्यतालिका अनुसार आइतबार र सोमबार (पुस १३ र १४ गते) राजनीतिक दलहरुले समानुपातिकतर्फ बन्दसूची पेस गर्नुपर्ने छ ।

अधिकांश दलहरुले आन्तरिक विवादका कारण समानुपातिक उम्मेदवार सय गर्न सकेका छैनन् । कांग्रेस सभापति शेरबहादुर देउवाले त केही समय पथ गरिदिनसमेत माग गरेका थिए, तर, निर्वाचन आयोगले तोकिएकै समयमा सूची बुझाउन भनेको छ ।

राष्ट्रिय स्वतन्त्र पार्टीले देशैभरिबाट आन्तरिक रुपमा अनलाइन भोटिङ गरेर उम्मेदवारहरु छनोट गर्ने भनेको छ । तर, उसले आइतबार साँझसम्म भोटिङको समय तोकेको छ । एमाले लगायतका दलहरुले बन्दसूचीबारे कुनै प्रतिक्रिया दिइसकेका छैनन् । तर, सबै दलले चुनावमा भाग लिने प्रतिवद्धता जनाइसकेका छन् ।

निर्वाचन आयोगद्वारा  तय गरिएको समानुपातिक निर्वाचन प्रणालीतर्फको निर्वाचन कार्यक्रम कात्तिक ३० गते नै राजपत्रमा गतेको नेपाल राजपत्रमा प्रकाशित भइसकेको छ ।

उक्त निर्वाचन कार्यक्रमबमोजिम उम्मेदवारको बन्दसूची पुस १३ र १४ गते दुई दिन अपरान्ह ४ बजेसम्म निर्वाचन अधिकृतको कार्यालयमा पेस गर्नुपर्ने हुन्छ ।

तोकिएबमोजिमको विधि, प्रक्रिया र प्रमाण कागजात पूरा गरेर, रीत पुर्‍याएर मात्रै उम्मेदवारको बन्दसूची तयार गरी निर्वाचन कार्यक्रममा निर्धारित समयभित्र समानुपातिक निर्वाचन प्रणालीतर्फको निर्वाचन अधिकृतको कार्यालयमा उम्मेदवारको बन्दसूची पेस गर्न आयोगले भनेको छ ।

राजनीतिक दलले समानुपातिक उम्मेदवारको बन्दसूची निर्वाचन अधिकृतको कार्यालयमा पेस गरेपछि वा पेस गर्नुअघि सर्वसाधारणको जानकारीका लागि सार्वजनिक गर्न सक्ने आयोगले बताएको छ ।

संविधानअनुसार कुल २७५ सदस्यीय प्रतिनिधिसभामा १६५ सीटमा प्रत्यक्ष निर्वाचन हुन्छ भने दलले पाएको देशभरिको मत अनुसार समानुपातिकतर्फ ११० जना चुनिन्छन् ।