विशेष अदालतद्वारा ‘फैसलाहरूको संगालो २०८३’ विमोचन

काठमाडौँ । विशेष अदालतले आज श्रावण १ गते पुस्तक विमोचन तथा संचारकर्मीहरूसँग भेटघाट कार्यक्रम आयोजना गरेको छ। कार्यक्रमको आयोजना र सञ्चालन विशेष अदालतकी प्रवक्ता पार्वती हितानले गरेकी थिइन्।

कार्यक्रमको सुरुवातमा विशेष अदालतका ६ जना न्यायाधीशहरूले संयुक्त रूपमा ‘विशेष अदालतबाट भएका केही फैसलाहरूको संगालो, २०८३’ पुस्तकको विमोचन गरे। विशेष अदालतका सदस्य नारायणप्रसाद पौडेलले पुस्तकबारे जानकारी दिँदै भने, ‘यो पुस्तकमा आर्थिक वर्ष २०८१/०८२ देखि ०८२/०८३ सम्मका २८ वटा फैसलाका ठहर खण्डहरू समावेश छन् । साथै, एक मानहानीसम्बन्धी मुद्दाको पूर्ण विवरण पनि यसमा दिइएको छ।’

त्यसलगत्तै उप-रजिस्ट्रार कृष्ण शरण लामिछानेले विशेष अदालतको वार्षिक कार्यप्रगति प्रस्तुत गरे ।

त्यसपछि संचारकर्मीहरूसँग अन्तरक्रिया कार्यक्रम चलाइयो । अन्तरक्रियाका क्रममा न्यायिक पत्रकार मञ्चकी अध्यक्ष कलिका खड्का लगायत उपस्थित अन्य सञ्चारकर्मीहरुले आफ्ना जिज्ञासा र चासो राखे । 

अन्तरक्रिया कार्यक्रममा उठेका प्रश्नका जवाफ दिँदै  विशेष अदालतका न्यायाधीश हेमन्तराज रावलले संचारकर्मीहरूलाई सम्बोधन गरी न्यायपालिका र प्रेसबीचको सहकार्यको आवश्यकता औंल्याए । उनले भने, `स्वतन्त्र प्रेस, पारदर्शी, न्यायसंगत र जवाफदेही न्यायपालिका निर्माणका लागि अदालत र संचारकर्मीबीच सहकार्य हुनुपर्छ। फैसलाहरू समयमै उपलब्ध गराउन अदालतले सहयोग गर्नेछ।’

कार्यक्रमको समापन गर्दै विशेष अदालतका अध्यक्ष न्यायाधीश सुदर्शनदेव भट्टाले अदालत र संचारकर्मीबीचको समन्वयलाई थप मजबुत बनाउने प्रतिबद्धता व्यक्त गर्दै कार्यक्रममा सहभागीहरुलाई धन्यवाद दिए ।