‘नगद वितरण गरेकाे’ आरोपमा धनकुटामा एमाले उम्मेदवार राईविरुद्ध उजुरी

धनकुटा । पूर्वमन्त्री तथा नेकपा एमालेका केन्द्रीय सदस्य राजेन्द्र कुमार राईविरुद्ध निर्वाचन आचारसंहिता उल्लंघन गरेको आरोपसहित उजुरी परेको छ । नेपाली कांग्रेसका तर्फबाट उम्मेदवार जिल्ला सभापति दिनेश राईले उम्मेदवारी खारेजीको मागसहित उजुरी दिएका हुन् ।

आगामी फागुन २१ गते हुने प्रतिनिधिसभा सदस्य निर्वाचनमा एमालेबाट उम्मेदवार रहेका राईले मतदाता प्रभावित पार्ने गरी नगद वितरण गरेको दाबी गर्दै मुख्य निर्वाचन अधिकृतको कार्यालयमा उजुरी दर्ता गरिएको हो ।

उजुरीमा सहिदभूमि गाउँपालिकाकी बासुरीवादक तीर्थकुमारी राईलाई नगदसहित सम्मान गरिएको विषयलाई आचारसंहिता विपरीत कार्य लेखिएको छ । कार्यक्रममा एमाले नेता तथा गाउँपालिका अध्यक्ष मनोज राईले पनि नगद सहयोग गरेको उल्लेख छ ।

मुख्य निर्वाचन अधिकृतको कार्यालयले दुवै पक्षलाई छलफलका लागि बोलाइएको र प्रमाणका आधारमा निर्णय गरिने जनाएको छ । आचारसंहिता उल्लंघन पुष्टि भए उम्मेदवारी खारेजीसम्मको कारबाही हुन सक्ने कार्यालयले जानकारी दिएको हो ।