सहकारी डुबाउनेमाथि कडा कारवाही हुनुपर्छ : मन्त्री इङनाम

काठमाडौँ । समस्याग्रस्त सहकारीहरुको समस्या चाँडै छिनोफानो हुनुपर्ने भूमि व्यवस्था, सहकारी तथा गरिबी निवारणमन्त्री प्रा.डा. कुमार इङ्नामले बताएका छन् । उनले सहकारी डुबाउनेहरुमाथि कडा कारवाही हुनुपर्ने समेत बताएका छन् ।

राष्ट्रिय सहकारी नियमन प्राधिकरणको प्रथम वार्षिकोत्सवका अवसरमा बुधबार ललितपुरमा आयोजित कार्यक्रममा बोल्दै मन्त्री इङ्नामले केही सहकारीले गैरकानुनी काम गरेर बचतकर्ता र ऋणीहरुलाई समेत समस्यामा पारेको बताए ।

समयमा नै सहकारी नियमन गर्ने निकायले वेवास्ता गरेको र राम्रोसँग स्वनियमन हुन नसक्दा केही सहकारीहरु समस्याग्रस्त बनेको उनले बताए । कानुन उल्लंघन गरेर सहकारी डुबाउनेहरुमाथि कडा कारवाही हुनुपर्नेमा मन्त्री इङनामले जोड दिए ।

मन्त्री इङ्नामले समस्याग्रस्त सहकारी व्यवस्थापन समितिको कामकारवाहीप्रति पनि असन्तुष्टि जनाए । समस्याग्रस्त समितिको अहिलेको कामले सयौं बर्षसम्म पनि समस्या समाधान नहुने उनको भनाइ छ । मन्त्री इङनामले एकैपल्ट एक हजारभन्दा बढी यस्ता समितिहरू गठन गर्नसकेमात्रै पीडितले छिटो न्याय पाउन सक्ने बताए ।

गत बर्ष माघ १४ गते स्थापना भएको राष्ट्रिय सहकारी नियमन प्राधिकरणले हालसम्म ५ हजार ३५० वटा सहकारी संस्थाहरुको अभिलेखीकरण प्रक्रियामा रहेको जनाएको छ । प्राधिकरणमा प्राप्त उजुरीहरुलाई अध्ययन र छानविनका साथ समस्या समाधान गर्ने प्रक्रिया अघि बढाइएको प्राधिकरणले जानकारी दिएको छ ।