टेलिकमका तत्कालीन निर्देशक पाैडेलसहित १८ जनाविरुद्धकाे भ्रष्टाचार मुद्दाकाे सुनुवाइ स्थगित

काठमाडौँ । नेपाल दूरसञ्चार कम्पनी लिमिटेड (नेपाल टेलिकम) का तत्कालीन प्रबन्ध निर्देशक सुनिल पौडेलसहित १८ जनाविरुद्ध दायर भ्रष्टाचार मुद्दाको सुनुवाइ विशेष अदालतमा स्थगित भएको छ ।

विशेष अदालतका अध्यक्ष सुदर्शनदेव भट्ट र न्यायाधीश डिल्लीरत्न श्रेष्ठको संयुक्त इजलासमा सुनुवाइका लागि तोकिएको पेसी प्रतिवादी पक्षका कानुन व्यवसायीको आग्रहमा स्थगित गरिएको हो ।

पौडेलसहितका प्रतिवादीमाथि नेपाल टेलिकमको विलिङ प्रणाली अपग्रेड गर्ने क्रममा मिलेमतोमा भ्रष्टाचार गरेको अभियोग छ । अख्तियार दुरुपयोग अनुसन्धान आयोगले उनीहरूविरुद्ध करिब ३३ करोड रुपैयाँ बिगो मागदाबी गर्दै मुद्दा दायर गरेको हो ।

अभियोगअनुसार २०६८ पुस ६ गते तत्कालीन व्यवस्थापनले चिनियाँ कम्पनी एसियाइन्फो लिंकेज टेक्नोलोजीसँग कन्भर्जेन्ट रियल–टाइम बिलिङ तथा ग्राहक समर्थन प्रणालीसम्बन्धी सम्झौता गरेको थियो । सो सम्झौतामार्फत विभिन्न दूरसञ्चार सेवालाई एउटै प्लेटफर्ममा एकीकृत गर्ने र रियल–टाइम बिलिङ प्रणाली लागू गर्ने उद्देश्य रहेको भए पनि त्यस प्रक्रियामा अनियमितता भएको आरोप छ ।