२६७ नेपाली कैदीलाई आममाफी दिने यूएईकाे निर्णय

काठमाडौँ । संयुक्त अरब इमिरेट्स (यूएई) ले ५४औँ राष्ट्रिय दिवसको अवसरमा २६७ जना नेपाली कैदीलाई आममाफी दिएको छ ।

उक्त निर्णयप्रति नेपाल सरकारले यूएई सरकारलाई धन्यवाद तथा कृतज्ञता व्यक्त गरेको छ । परराष्ट्र मन्त्रालयले आइतबार जारी गरेको विज्ञप्तिमा आममाफीको निर्णयलाई नेपाल–यूएई सम्बन्धमा आपसी मित्रता, सद्भाव र मानवीय सहयोगको सकारात्मक संकेतका रूपमा उल्लेख गरिएको छ ।

मन्त्रालयका अनुसार आबुधाबीस्थित नेपाली दूतावासले परराष्ट्र मन्त्रालयको समन्वयमा पटक–पटक गरेको कूटनीतिक पहलपछि यूएई सरकारले आममाफी दिने निर्णय गरेको हो ।

आममाफी प्राप्त गरेका नेपाली नागरिकमाथि अन्य कानुनी प्रक्रिया वा प्रतिबन्ध बाँकी नरहेको खण्डमा यूएईको कानुनअनुसार आवश्यक औपचारिकता पूरा गरी स्वदेश फर्कन सक्ने जनाइएको छ । परराष्ट्र मन्त्रालयले यूएईमा रहेका नेपाली नागरिकको हकहितका विषयमा कूटनीतिक पहललाई निरन्तर अघि बढाइरहेको जनाएको छ ।