रेशम चौधरीको उम्मेदवारी खारेजीविरुद्धको रिट शर्मा र ढकालको संयुक्त इजलासमा

काठमाडौँ । नागरिक उन्मुक्ति पार्टीका संरक्षक रेशमलाल चौधरीको उम्मेदवारी खारेजीसम्बन्धी रिट सर्वोच्च अदालतमा आज सुनुवाइका लागि पेश हुँदैछ ।

आइतबार हेर्न नभ्याइने सूचीमा परेको उक्त मुद्दामा आज सोमबार सर्वोच्च अदालतका न्यायाधीश मनोजकुमार शर्मा र बालकृष्ण ढकालको संयुक्त इजलासमा पेसी तोकिएको हो ।

कैलाली क्षेत्र नम्बर–१ बाट आगामी फागुन २१ मा हुने प्रतिनिधिसभा सदस्य निर्वाचनका लागि चौधरीले दिएको उम्मेदवारी निर्वाचन आयोगले खारेज गरेपछि उनले सर्वोच्च अदालतमा रिट दायर गरेका थिए । यसअघि सर्वोच्चले अन्तरिम आदेश दिन अस्वीकार गर्दै निर्वाचन आयोगसँग लिखित जवाफ मागिसकेको छ ।

टीकापुर घटनामा तीन तहका अदालतबाट दोषी ठहर भई सजाय कायम रहेकै आधारमा निर्वाचन आयोगले चौधरीको उम्मेदवारी खारेज गरेको हो ।