भारतमा न्यायाधीशविरुद्ध १० वर्षभित्र ८,६३० उजुरी

भारत । पछिल्ला १० वर्षयता भारतमा न्यायाधीशविरुद्ध ८,६३० उजुरी परेको त्यहाँको केन्द्रीय कानून मन्त्रालयले जनाएको छ ।

संसदमा उठेको सवालमा जवाफ दिँदै मन्त्रालयले चिफ जस्टिस अफ इण्डिया (सीजेआइ) को कार्यालयमा हाल कार्यरत न्यायाधीशविरुद्ध यति ठूलो सङ्ख्यामा उजुरी परेको जवाफ दिएको हो । उजुरीको रेकर्ड र ती न्यायाधीशविरुद्ध कारबाही भए/नभएको बारे भने मन्त्रालयले विस्तृत जानकारी दिएको छैन ।

द्रविड मुनेत्र कडगम (डीएमके) का सांसद मथेश्वरन वी.एस. ले लोकसभा बैठकमा शुक्रबार त्यहाँको सर्वोच्च न्यायालयका न्यायाधीशविरुद्ध प्राप्त भ्रष्टाचार, यौन दुर्व्यवहार र अन्य गम्भीर विचलनसँग सम्बन्धित उजुरीको सूची मागेका थिए ।

सर्वोच्च न्यायालयबाट प्राप्त तथ्याङ्कको आधारमा कानून तथा न्यायमन्त्री अर्जुन राम मेघवालले लोकसभामा लिखित जवाफ दिएका थिए । उनले सन् २०१६ देखि २०२५ सम्ममा न्यायाधीशविरुद्ध ८,३६० उजुरी परेको बताए ।

भारतमा प्रधानन्यायाधीश र हाइकाेर्टका मुख्य न्यायाधीशले ‘इन-हाउस’ कार्यविधि बमोजिम न्यायाधीशविरुद्ध उजुरी लिने गर्छन्‌ ।