मन्त्रीको सम्पत्ति : कृषिमन्त्रीसँग २ बाख्रा र १० कुखुरा, महिला मन्त्रीसँग एउटा कुकुर !

काठमाडौँ । प्रधानमन्त्री बालेन्द्र शाह र सबै मन्त्रीहरुको सम्पत्ति विवरण आइतबार सार्वजनिक भएको छ । सम्पत्ति विवरणमा मिडियाको मुख्य ध्यान कुन मन्त्रीसँग कति सुनचाँदी छ र कुन मन्त्री कति धनी छन् भन्नेतर्फ केन्द्रित भएको छ ।

प्रधानमन्त्री र मन्त्रीहरुले आफूसँग प्रशस्तै सुन रहेको देखाएका छन् । जग्गाजमीन, सेयर लगानी र बैंक मौज्दातसमेत प्रायःजसो मन्त्रीहरुसँगै प्रशस्त देखिएको छ । अधिकांश मन्त्री धनी वर्गबाटै आएको विवरणबाट प्रष्ट हुन्छ ।
प्रधानमन्त्री र मन्त्रीहरुले भर्ने सम्पत्ति विवरणसम्बन्धी फारममा एउटा कोलम ‘कृषि तथा पशुधन’ समेत उल्लेख छ ।

मिडियाले मन्त्रीहरुको सुनचाँदी, नगद र सेयर लगानीबारे हिसाब–किताब गरिरहँदा जस नेपालले चाहिँ कुन मन्त्रीसँग कति ‘पशुधन’ रहेछ भन्नेबारे चासो राखेको छ ।

एकजना मन्त्रीले बाहेक कसैले पनि कुकुरसम्म पालेको पाइएन । कृषिमन्त्रीले भने माइतीबाट ल्याएर बाख्रा र केही कुखुरा पालेको भेटियो ।

पशुधनको कुरा गर्दा महिला, बालबालिका तथा ज्येष्ठ नागरिक मन्त्री सीता बादीले २० वटा कुखुरा र एउटा कुकुर पालेको पाइएको छ ।

कषि तथा पशुपंक्षी मन्त्री गीता चौधरीसँग २ वटा बाख्रा र १० वटा कुखुरा रहेका छन् । मन्त्री चौधरीले ती बाख्रा र कुखुरा माइतबाट उपहार पाएकी हुन् ।

पर्यटनमन्त्री खड्कराज पौडेलले आफ्नो सम्पत्ति विवरणमा ‘केही पशु तथा चारचुरुङी’ समेत रहेको विवरण पेश गरेका छन् ।

मन्त्रीत्रय बादी, चौधरी र पौडेलबाहेक अरु कसैसँग पनि पशुधनका रुपमा ‘चरो–मुसो’ पाइएन । कुकुर पाल्ने मन्त्री पनि एकजना मात्र भेटिए ।

मन्त्रीहरुसँग सुनचाँदी, गरगहना भने भरीभराऊ पाइएको छ । अधिकांश मन्त्रीले सुनको स्रोत ‘विवाहबाट प्राप्त’ भनेका छन् ।

आधुनिक युगमा ‘कोर्ट म्यारिज’को जमाना आए पनि नयाँ भनिएका नेताहरुले पनि बिहेमा सुनको प्रयोग खुलेरै गर्दारहेछन् भन्ने देखिएको छ । विगतमा सरकारमा पुराना पार्टीका नेताहरुले पनि सम्पत्ति विवरणमा सुन देखाउने गरेका थिए । उनीहरुले पनि सुन ‘बिहेमा प्राप्त गरेको’ भन्ने गरेका थिए ।

सुनपछि घडेरी र सेयरमा लगानी गर्ने ‘ट्रेन्ड’ समेत राम्रै देखिएको छ । बैंकबाट ऋण लिएर गाडी किन्ने मन्त्रीहरु पनि भेटिएका छन् ।

उता, गोरखाका सुधन गुरुङले धनकुटाको कार्कीछापमा समेत १९ रोपनी जग्गा जोड्न भ्याएका रहेछन् । उक्त जग्गा ‘लगानीबाट प्राप्त’ आम्दानीले जोडेको उनले बताएका छन् ।

कतिपय मन्त्रीहरुले बुझाएको सम्पत्ति विवरणमा भने टिपेक्स लगाएको पाइएको छ ।

प्रधानमन्त्री बालेन्द्र शाहले भने टिकटक, युट्युब आदि सामाजिक सञ्जालबाटै करोडौं आम्दानी गरेको सम्पत्ति विवरणमा खुलेको छ ।

आखिर जे भए पनि बालेन सरकारका मन्त्रीहरुले आफ्नो सम्पत्ति सार्जनिक गरेका छन् । सुशासनका लागि यो अनिवार्य गर्नैपर्ने कार्य हो ।

भ्रष्टाचार निवारण ऐन २०५९ को दफा ५० को उपदफा (१) अनुसार मन्त्री बनेको ६० दिनभित्र सम्पत्ति विवरण सार्वजनिक गर्नैपर्ने हुन्छ ।

त्यस्तै, अख्तियार दुरुपयोग अनुसन्धान आयोगको दफा ३१ को उपदफा (१) ले पनि सम्पत्ति विवरण बुझाउनुपर्ने बाध्यकारी व्यवस्था गरेको छ ।

प्रधानमन्त्री तथा मन्त्रीहरुको सम्पत्ति विवरण हेर्नका लागि तलको लिंकमा क्लिक गर्नुहोस् –

सम्माननीय प्रधानमन्त्रीज्यू र माननीय मन्त्रीज्यूहरूको सम्पत्ति विवरण