ट्रम्पविरुद्ध यौन दुर्व्यवहारको आरोप लगाएकी पत्रकार ई. जीन क्यारोल अनुसन्धानको घेरामा

काठमाडौं । अमेरिकी न्याय विभाग (DOJ) ले पत्रकार ई. जीन क्यारोलमाथि आपराधिक अनुसन्धान सुरु गरेको अन्तर्राष्ट्रिय सञ्चारमाध्यमहरूले जनाएका छन् । राष्ट्रपति डोनाल्ड ट्रम्पविरुद्ध यौन दुर्व्यवहारको आरोप लगाएकी क्यारोलले अदालतमा दिएको बयानमा झुट बोलेको (perjury) आरोपमा अनुसन्धान थालिएको बताइएको छ ।

CNN का अनुसार, DOJ को अनुसन्धान क्यारोलले ट्रम्पविरुद्ध दायर गरेका देवानी मुद्दाहरूमा अदालतसमक्ष गलत जानकारी दिएको थियो वा थिएन भन्ने विषयमा केन्द्रित हुनेछ ।

क्यारोलले ट्रम्पविरुद्ध दायर गरेको मुद्दामा सन् २०२२ मा जूरीले ट्रम्पलाई यौन दुर्व्यवहारमा जिम्मेवार ठहर गर्दै ५० लाख डलर क्षतिपूर्ति दिलाएको थियो । त्यसपछि ट्रम्पले सार्वजनिक रूपमा दिएको टिप्पणीलाई मानहानिजन्य ठहर गर्दै अर्को जूरीले क्यारोललाई ८ करोड ३३ लाख डलर क्षतिपूर्ति दिने फैसला गरेको थियो ।

मे महिनाको सुरुमा संघीय पुनरावेदन अदालतले ट्रम्पको पुनःसुनुवाइ माग अस्वीकार गरेको थियो। त्यसपछि अमेरिकी न्याय विभागले ट्रम्पको पक्षमा हस्तक्षेप गर्ने घोषणा गर्दै सर्वोच्च अदालतमा दायर अपिलमा साथ दिएको छ ।

अन्तर्राष्ट्रिय सञ्चारमाध्यमका अनुसार, कार्यवाहक महान्यायाधिवक्ता टड ब्लान्चे उक्त अनुसन्धानबाट अलग भएका छन्, उनी यसअघि ट्रम्पका व्यक्तिगत वकिलका रूपमा उक्त मुद्दामा संलग्न थिए ।

अनुसन्धानको नेतृत्व अमेरिकी अधिवक्ता एन्ड्रयू बाउट्रोसले गरिरहेका छन् ।

क्यारोलले ट्रम्पविरुद्ध दुईवटा मुद्दा दायर गरेकी थिइन् । पहिलो मुद्दामा उनले सन् १९९० को दशकमा न्यूयोर्कस्थित एक डिपार्टमेन्ट स्टोरमा ट्रम्पले आफूलाई यौन दुर्व्यवहार गरेको आरोप लगाएकी थिइन् ।

दोस्रो मुद्दा ट्रम्पले सन् २०१९ मा उक्त आरोप अस्वीकार गर्दै “क्यारोल आफ्नो प्रकारकी महिला नभएको” तथा “पुस्तक बिक्री बढाउन बनावटी आरोप लगाएको” दाबी गरेपछि मानहानिसम्बन्धी दायर गरिएको थियो ।

अमेरिकी संघीय अभियोजकहरूले अहिले सन् २०२२ को एक भिडियो बयानमाथि पनि अनुसन्धान गरिरहेका छन् । जसमा क्यारोलले ट्रम्पविरुद्धको मुद्दाका लागि आफूले कुनै बाह्य आर्थिक सहयोग नलिएको बताएकी थिइन् । पछि अर्बपति ब्यापारी रिड होफम्यानले क्यारोलका केही कानुनी खर्च तथा अन्य व्यय व्यहोरेको सार्वजनिक भएको थियो ।