अर्काकी छोरीलाई आफ्नै बनाएर नागरिकता : वीरगञ्जका मेयर सिंहसहित ७ जनाविरुद्ध भ्रष्टाचार मुद्दा

काठमाडौँ । अख्तियार दुरुपयोग अनुसन्धान आयोगले वीरगञ्ज महानगरपालिकाका मेयर राजेशमान सिंहसहित ७ जनाविरुद्ध भ्रष्टाचार मुद्दा दायर गरेको छ । आयोगले गलत विवरण पेश गरी अर्काकी छोरीलाई आफ्नै छोरीका रूपमा नागरिकता दिलाएको आरोपमा विशेष अदालतमा आरोपपत्र दायर गरेको हो ।

आयोगका अनुसार मेयर सिंहले वीरगञ्ज महानगरपालिका वडा नम्बर ३ का तत्कालीन वडा सचिव भिखारी राय, तत्कालीन वडा सदस्य तथा कार्यवाहक वडा अध्यक्ष तुफेल अख्तर ठकुराई र जिल्ला प्रशासन कार्यालय पर्साका तत्कालीन प्रशासकीय अधिकृत षडकुमार पोखरेलसँग मिलेमतो गरी अर्काकी छोरी रुबिना श्रेष्ठको नाममा जन्मदर्ता र नागरिकता बनाएको आरोप छ ।

अनुसन्धानबाट २०७१ कात्तिक २० गते रुबिना श्रेष्ठको नाममा जन्मदर्ता प्रमाणपत्र जारी गरिएको र सोही आधारमा २०७५ साउन १३ गते जिल्ला प्रशासन कार्यालय पर्साबाट नागरिकता प्रमाणपत्र जारी गरिएको पाइएको अख्तियारले जनाएको छ ।

यस्तै, गृह मन्त्रालयले गठन गरेको छानबिन समितिका तत्कालीन संयोजक पुष्कर राना र सदस्य परशुराम पोखरेलले समेत वास्तविक तथ्य लुकाई गलत प्रतिवेदन दिएको आरोप अख्तियारको छ । उनीहरूविरुद्ध भ्रष्टाचार निवारण ऐनअन्तर्गत मुद्दा दायर गरिएको छ ।

अख्तियारले मेयर सिंह र रीता भट्टराईलाई भ्रष्टाचारजन्य कार्यबाट लाभ लिएको आरोपमा मुख्य कसुरदारसरह सजायको माग गर्दै विशेष अदालतमा आरोपपत्र दायर गरेको जनाएको छ ।

छुटाउनुभयो कि ? –  भ्रष्टाचार मुद्दा लागेपछि वीरगञ्जका मेयर पदबाट स्वतः निलम्बन 

हेर्नुहोस् आरोपपत्र :