दृष्टिविहीन नागरिक नौ दिनदेखि माइतीघरका सडकमा

काठमाडौँ । सडकपेटी आश्रित दृष्टिविहीन नागरिकहरूले काठमाडौंको माइतिघरमा निरन्तर धर्ना दिएका छन् ।

सडकपेटीलाई कार्य क्षेत्र बनाएका दृष्टिविहीन तथा न्यून दुष्टियुक्त व्यक्तिहरूमाथि काठमाडौँ महानगर लगाएत बिभिन्न निकायहरूले बलपूर्ण धरपकड गरेको भन्दै उनीहरूले नौ दिनदेखि काठमाडौँको माइतीघरमा निरन्तर धर्ना दिएका हुन् ।

सडकपेटी केन्द्रीय स्वरोजगारमूलक दृष्टिविहीन व्यवसायीहरूको समूहको अगुवाइमा भएको धर्नामा सहभागीहरुले सरकारले दृष्टिविहीनहरूको गाँस, बास र कपासको ग्यारेन्टी नगरेको र उल्टै सडकमा व्यापार गरेर जीवनयापन गर्न समेत नदिएको गुनासो गरेका छन् ।

सडकपेटी आश्रित दृष्टिविहीन नागरिक पूर्णबहादुर रोकायाले क्षमताका आधारमा रोजगारीको व्यवस्था हुनुपर्ने, दृष्टिविहीन नागरिकहरूले उत्पादन गरेका बस्तुहरू राज्यले खरिद गर्नुपर्ने माग रहेको बताए ।

राज्यले दिएको अपाङ्ग भत्ताले जीवननिर्वाह गर्न कठिन भएकाले सडकपेटीलाई कार्यस्थल बनाउन नदिने राज्यले नै उचित व्यवस्थापन गर्नुपर्ने उनीहरूको भनाइ छ ।