पत्रकार किशोर श्रेष्ठलाई रिहा गर्न सर्वोच्चको आदेश

काठमाडौँ । सर्वोच्च अदालतले जनआस्थाका पत्रकार कशोर श्रेष्ठलाई रिहा गर्न आदेश दिएको छ ।

जिल्ला अदालत काठमाडौंको आदेशले प्ररही हिरासतमा रहेका पत्रकार श्रेष्ठलाई हाजिर जमानीमा छाड्न सर्वोच्च अदालतले आदेश दिएको हो ।

पत्रकार श्रेष्ठलाई रिहा गर्न माग गर्दै पत्नी सरस्वती श्रेष्ठले सर्वोच्च अदालतमा बन्दी प्रत्यक्षीकरणको रिट दायर गरेकी थिइन् ।

रिटमाथि सुनुवाई गर्दै न्यायाधीश नहकुल सुवेदी र बालकृष्ण ढकालको संयुक्त इजलासले श्रेष्ठलाई हाजिरी जमानीमा रिहा गर्न प्रहरीका नाममा आदेश जारी गरेको हो ।

प्रहरीले जफत गरेका कम्प्युटर लगायतका सामग्रीहरु अदालतका सहरजिष्ट्रारको रोहबरमा फिर्ता गर्न समेत अदालतले प्रहरीलाई भनेको छ ।

पत्रकार श्रेष्ठलाई समाचार लेखेकै आधारमा प्रहरीले साउन २७ गते साँझ ललितपुरस्थित निवासबाटै पक्राउ गरेको थियो ।

गोपनीयता सम्बन्धी ऐनको दफा लगाएर पक्राउ गरेपछि प्रहरीले जनआस्था साप्ताहिकको कार्यालय र श्रेष्ठको घरमा समेत खानतासी गरी कम्युटर, मोबाइल लगायतका सामग्रीहरु जफत गरेको थियो ।
श्रेष्ठलाई काठमाडौं जिल्ला अदालतले शुरुमा तीन दिन हिरासतमा राख्न अनुमति दिएको थियो । सोमबार मात्रै जिल्ला अदालतले चार दिन म्याद थपेको थियो ।

गत शुक्रबार पत्रकार श्रेष्ठकी पत्नी सरस्वती श्रेष्ठले सर्वोच्च अदालतमा बन्दी प्रत्यक्षीकरणको रिट दायर गरेकी थिइन् । अदालतले जफत गरिएका सामग्रीसहित श्रेष्ठलाई अदालतमा उपस्थित गराउन भनेको थियो ।