इन्जिनियर श्रीमानले भ्रष्टाचार गर्दा श्रीमतीलाई पनि मुद्दा

काठमाडौँ । अख्तियार दुरुपयोग अनुसन्धान आयोगले सडक डिभिजन कार्यालय भक्तपुरका इन्जिनियर शैलेन्द्र कुमार चौधरी र उनकी श्रीमती अर्पना कुमारीविरुद्ध विशेष अदालतमा आरोपपत्र दायर गरेको छ। निजले पदीय मर्यादाविपरीत गैरकानुनी रूपमा दुई करोड २६ लाख १३ हजार एक सय २३ रुपैयाँ ३६ पैसा बराबरको सम्पत्ति आर्जन गरेको ठहर गर्दै आयोगले कैद, जरिवाना र सम्पत्ति जफतको मागदाबी लिएको हो ।

आयोगका अनुसार शैलेन्द्र कुमार चौधरी सुरू नियुक्ति भएको २०६५ साल पुस ११ गतेदेखि २०८२ साल असार २९ गतेसम्मको अवधि जाँच अवधि कायम गरी निज तथा एकाघर परिवारको आय-व्यय विश्लेषण गरिएको थियो ।

जाँच अवधिमा बैधानिक स्रोतबाट जम्मा दुई करोड ७२ लाख ५५ हजार सात सय ६६ रुपैयाँ छ पैसा आय देखिए पनि जग्गा–घर खरिद, सवारी साधन, बिमा, शिक्षा खर्च, कर्जा भुक्तानी, लगानी, सुन खरिदलगायत शीर्षकमा चार करोड ९८ लाख ६८ हजार आठ सय ८९ रुपैयाँ ४२ पैसा खर्च तथा लगानी भएको पाइयो।

यसरी कुल आयभन्दा व्यय दुई करोड २६ लाख १३ हजार एक सय २३ रुपैयाँ ३६ पैसाले बढी देखिएपछि उक्त रकम स्रोत नखुलेको गैरकानुनी सम्पत्ति ठहर गरिएको छ ।

भ्रष्टाचार निवारण ऐन २०५९ को दफा २० बमोजिमको कसुरमा बिगो कायम गरी कैद र जरिवानाको मागदाबी लिइएको छ भने झुट्टा सम्पत्ति विवरण पेस गरेको अभियोगमा दफा १६ बमोजिम थप सजाय र लुकाइएका सम्पत्ति जफतको मागसमेत गरिएको छ ।

श्रीमती अर्पना कुमारीलाई भने निजका नाममा रहेका स्रोत नखुलेका सम्पत्ति जफत गर्न मात्र प्रतिवादी कायम गरिएको आयोगले स्पष्ट पारेको छ ।

हेर्नुहोस् विज्ञप्ति –