आज तकको लोगो चोर्नेलाई अदालतको रोक

नयाँदिल्ली । भारतीय टेलिभिजन आजतकको लोगोमाथि ‘चर्चा आज की’ लेखेर नयाँ अनलाइन टीभी चल्दै आएको थियो । तर, भारतीय अदालतले अर्काको लोगो कपी गरेर चलाउन नपाइने आदेश गरेको छ ।

दिल्ली उच्च अदालतले डिजिटल समाचार च्यानल ‘चर्चा आज की’ द्वारा ट्रेडमार्क उल्लङ्घन गरेको भन्दै समाचार च्यानल आज तकको लोगोलाई बचाउन अन्तरिम निषेधाज्ञा आदेश जारी गरेको हो।

न्यायाधीश ज्योति सिंहको इजलासले ‘चर्चा आज की’ लाई आज तक ट्रेडमार्क गरिएको लोगोको विशिष्ट रातो-सेतो-कालो रंग संयोजन र रूपरेखा सीमानाहरू यसको सामाजिक सञ्जाल ह्यान्डल, वेबसाइट वा अन्य कुनै प्लेटफर्ममा प्रयोग गर्नबाट रोक लगाएको हो।

अदालतले ‘चर्चा आज की’ कार्यक्रमको नाम भने कायमै राख्न अनुमति दिएको छ।

आज तकको मातृ कम्पनी लिभिङ मिडियाले आज तक मार्क पहिलो पटक १९९५ मा प्रयोग भएको र ट्रेडमार्क रजिस्ट्रीद्वारा प्रकाशित प्रसिद्ध ट्रेडमार्कहरूको सूचीमा समावेश भएको भन्दै उच्च अदालतमा निवेदन दिएपछि अदालतले यस्तो आदेश दिएको हो।

-बार एन्ड बेञ्चबाट