सर्वोच्चमा जल्नबाट जोगिएका पुराना किताव बिक्रीमा

काठमाडौँ । सर्वोच्च अदालतमा सेतो पालभित्र राखिएका पुराना पुस्तक र पत्रपत्रिकाहरुको विक्री खुला गरिएको छ ।

गत भदौ २४ गते सर्वोच्च अदालत जल्दा धेरै कागजात र किताबहरु नष्ट भएता पनि केही पुराना किताब र पत्रपत्रिकाहरु बचेका छन् । ती बचेका किताब र पत्रपत्रिका सस्तो मूल्यमा विक्रीका लागि खुला गरिएको अदालत स्रोतले जानकारी दिएको छ ।

कानूनका विद्यार्थी, कानून व्यवसायी ट एवं सर्वसाधारणले सेतो पालभित्र छरपस्ट राखिएका पुस्तक र पत्रपत्रिकाहरु अति सस्तो मूल्यमा किनेर लैजान सक्ने प्रबन्ध अदालतले गरेको छ ।

आफूलाई उपयुक्त लागेका सामग्रीहरु संकलन गरी बिल काटेर खरीद गर्न पाइने व्यवस्था अदालतले गरेको छ ।

विक्रीका लागि खुला गरिएका किताब र पत्रपत्रिकाहरुमा सर्वोच्च अदालतका ऐतिहासिक निर्णयहरु, अदालतका पञ्चवर्षीय योजनासम्बन्धी सामग्री, कानूनी पत्रिकाका एवं फौजदारी र देवानी कानूनसँग सम्बन्धित सामग्रीहरु रहेका छन् ।