जलेको काठमाडौं जिल्ला अदालत आजदेखि पूर्ण सञ्चालनमा

काठमाडौँ । गत भदौ २४ गतेको आगजनीबाट क्षति भएको काठमाडौँ जिल्ला अदालतको मूल भवन आइतबारदेखि पूर्ण सञ्चालनमा आएको छ।

मूल भवनमा आगजनीबाट क्षतिपुग्दा त्यहाँ सञ्चालन भइरहेका २३ वटा इजलासहरु प्रभावित भएका थिए । आज (चैत ८ गते ) देखि उक्त जलेको संरचनामा पनि इजलास सञ्चालन हुन थालेको अदालतले जनाएको छ ।

क्षति भएको मूल भवनको तेस्रो, चौथो र पाँचौ तलाका केही इजलास तथा कोठाहरू सञ्चालन गर्न सकिने भनी शहरी विकास तथा भवन निर्माण कार्यालयबाट प्राप्त प्रतिवेदनमा उल्लेख भई आएअनुसार उक्त तलामा समेत नियमित इजलास सञ्चालन हुन थालेको अदालतको सूचनामा भनिएको छ ।

मूल भवन, दोस्रो भवन, तेस्रो भवन र चौथो भवनमा समेत इजलास कायम हुने अदालतले सूचनामार्फत जानकारीदिएको छ ।

तर, मूल भवनमा सीमित संख्यामा सेवाग्राही प्रवेश गराउनुपर्ने भएकोले अनिवार्यरुपमा प्रवेश पास लिएर तोकिएको सेवाग्राही मात्रै इजलासमा प्रवेश गर्नुहुन अदालतले भनेको छ ।