सर्वोच्चले भन्यो: दीपक भट्टलाई बन्दीसहित अदालतमा उपस्थित गराउनु

काठमाडौं । सर्वोच्च अदालतले व्यवसायी दीपक भट्टलाई थुनामा राख्नुको कानुनी कारण खुलाएर अदालतमा उपस्थित गराउन विपक्षी निकायहरूलाई ‘कारण देखाऊ आदेश’ जारी गरेको छ ।

व्यवसायी दीपक भट्टको हकमा उनकी पत्नी आयुष्मा नेपालले दायर गरेको बन्दी प्रत्यक्षीकरण रिटमा सर्वोच्च अदालतले यो आदेश दिएको हो । न्यायाधीश अब्दुल अजिज मुसलमानको एकल इजलासले यो निर्णय सुनाएको छ ।

अदालतले दीपक भट्टलाई गैरकानुनी थुनामा राखिएको दाबीलाई गम्भीरतापूर्वक लिँदै विपक्षी निकायहरूलाई भट्टलाई थुनामा राख्नुपर्ने स्पष्ट कानुनी आधारसहित बन्दीसहित अदालतमा उपस्थित गराउन आदेश दिएको छ। यो ‘कारण देखाऊ आदेश’ हो ।

सोमबार न्यायाधीश अब्दुल अजिज मुसलमानको इजलासले आदेश जारी गरेको हो। रिट भने गत वैशाख १८ गते दर्ता भएको थियो ।

विपक्षी बनाइएका निकायहरूमा काठमाडौं जिल्ला अदालत बबरमहल, सम्पत्ति शुद्धीकरण अनुसन्धान विभाग, प्रहरी केन्द्रीय अनुसन्धान ब्युरो (सीआईबी) र महानगरीय प्रहरी प्रभाग छन् ।

भट्टलाई गैरकानुनी रूपमा हिरासतमा राखिएको भन्दै पत्नी आयुष्मा नेपालले रिट दायर गरेकी थिइन् । अदालतले थुनाको वैधता जाँच गर्न कारण मागेको हो ।

अब विपक्षी निकायहरूले दीपक भट्टलाई अदालतमा उपस्थित गराउँदै थुनामा राख्नुपर्ने कानुनी आधार स्पष्ट गर्नुपर्नेछ । भट्टमाथि हाल सम्पत्ति शुद्धीकरण अनुसन्धान विभागले सम्पत्तिको स्रोत र वैधता छानबिन गरिरहेको छ भने सीआईबीले सेयर बजार अनियमिततासम्बन्धी आरोपमा अनुसन्धान अघि बढाएको छ ।

यो आदेशसँगै भट्टको हिरासतको वैधानिकता अब अदालतको प्रत्यक्ष जाँचमा आउने भएको छ ।