प्रधानन्यायाधीश नियुक्ति : रास्वपाभित्रै दुई धार

काठमाडौँ । नयाँ प्रधानन्यायाधीशको नाम सिफरिसका लागि विहीबार साँझ सिंहदबारमा संवैधानिक परिषदको बैठक शुरु भएको छ ।

बैठकमा परिषदका अध्यक्षसमेत रहेका प्रधानमन्त्री बालेन्द्र शाह र सदस्यका रुपमा सभामुख डीपी अर्याल, राष्ट्रियसभाका अध्यक्ष नारायण दाहाल, विपक्षी दलका नेता भीष्मराज आङदेम्बे, कानूनमन्त्री सोबिता गौतम र उपसभामुख रुवी कुमारी सहभागी छन् ।

संवैधानिक परिषदमा प्रधानन्यायाधीश सदस्यका रुपमा रहने भएता पनि प्रधानन्यायाधीशको सिफरिस गर्ने बैठकमा भने कानूनमन्त्री सदस्यका रुपमा रहने संविधानको धारा २८४ को (३) मा व्यवस्था रहेको छ । यही व्यवस्था अनुसार बैठकमा कायममुकायम प्रधानन्यायाधीश सपना प्रधान मल्लको साटो कानूनमन्त्री गौतम सहभागी बनेकी हुन् ।

न्याया परिषदले तयार पारेको योग्यतासम्बन्धी रोष्टरमा सर्वोच्च अदालतका ६ जना न्यायाधीशलाई प्रधानन्यायाधीशका लागि योग्य ठहर्‍याइएको छ । परिषदले यिनै ६ जनामध्येबाट एकजनालाई प्रधानन्यायधीशका रुपमा सिफारिस गर्नेछ ।

प्रधानन्यायाधीशका लागि योग्यतम् ६ न्यायाधीशहरुमा सपना प्रधान मल्ल, कुमार रेग्मी, हरिप्रसाद फुयाल, डा. मनोजकुमार शर्मा, डा. नहकुल सुवेदी र तिलप्रसाद श्रेष्ठ छन् । सर्वोच्च अदालतको परम्पराअनुसार बरिष्ठतमलाई नै प्रधानन्यायाधीशमा सिफारिस गर्ने प्रचलन छ ।

संवैधानिक परिषदले सिफारिस गरेको नामलाई ४५ दिनभित्र संसदीय सुनुवाई समितिले अनुमोदन गरेपछि नियुक्तिका लागि राष्ट्रपतिसमक्ष पठाइने संवैधानिक व्यवस्था छ ।

संसदीय सुनुवाइ समितिमा १५ जना सदस्य रहन्छन्, जहाँ रास्वपाका बहुमत (८ जना) सांसद छन् । यो अंकगणितका आधारमा हेर्दा परिषदले सिफारिस गरेको नामलाई सुनुवाई समितिले सदर गर्ने सम्भावना बढी छ ।

रास्वपाभित्रै दुई धार

उच्च स्रोतबाट प्राप्त जानकारी अनुसार कसलाई प्रधानन्यायाधीश बनाउने भन्ने विषयमा रास्वपाका नेताहरुबीच मत बाझिएको छ ।

सभापति रवि लामिछाने निकटका नेताहरु अदालतको परम्परालाई नबिथोली सपना प्रधान मल्ललाई नै सिफारिस गरिनुपर्ने पक्षमा छन् भने प्रधानमन्त्री बालेन्द्र शाहचाहिँ सिनियर तीनजना न्यायायाधीशहरुलाई बाइपास गरेर परम्परा तोड्नुपर्ने पक्षमा उभिएका छन् ।

संवैधानिक परिषदमा रास्वपाका तीनजना प्रतिनिधि छन्– बालेन्द्र शाह, डीपी अर्याल र सोबिता गौतम ।

अब संवैधानिक परिषदले पार्टीको भावना अनुसार निर्णय गर्छ या प्रधानमन्त्री बालेन्द्र शाहको इच्छाअनुसार निर्णय गर्छ, त्यो केहीबेर पछि नै थाहा हुनेछ ।

याे पनि – ब्रेकिङ : प्रधानन्यायाधीशमा मनाेज शर्माकाे नाम सिफारिस