दुर्गा प्रसाईलाई रिहा गर्न सर्वोच्चको आदेश

काठमाडौं । मेडिकल व्यवासायी दुर्गा प्रसाईलाई थुना मुक्त गर्न सर्वोच्च अदालतले आइतबार बन्दी प्रत्यक्षीकरणको आदेश दिएको छ ।

न्यायाधीशद्वय नहकुल सुवेदी र श्रीकान्त पौडेलको इजलासले आइतबार प्रसाईलाई छाड्न बन्दी प्रत्यक्षीकरणको आदेश दिएको हो ।

नेपालको संविधानले निवारक नजरबन्दविरुद्धको हकलाई मौलिक हक अन्तरगत राखेको छ । यस अधिकार अन्तर्गत कसैलाई पनि विनाकारण गैरकानूनी रुपमा थुनामा राख्न पाइँदैन । त्यसरी थुनामा राखिएको व्यक्तिलाई प्रत्यक्षरुपमा अदालतमा झिकाएर गरिने सुनुवाई लाई बन्दी प्रत्यक्षीकरण भनिन्छ ।

प्रसाईले भिडियोमार्फत सार्वजनिक शान्तिमा खलल पुर्‍याउने अभिव्यक्ति दिएको भन्दै प्रहरीले उनलाई भक्तपुरस्थित निवासबाटै पक्राउ गरेको थियो ।

उनको गिरफ्तारीविरुद्ध छोरा निराजन प्रसाईले सर्वोच्चमा बन्दी प्रत्यक्षीकरणको रिट दायर गरेका थिए ।

उक्त रिटमा सुनुवाई गर्दै आइतबार अदालतले प्रसाईलाई थुनामुक्त गर्न भनेको हो ।

सर्वोच्चको आदेशलगत्तै आइतबार साँझ प्रसाई रिहा भएका छन् ।