नेपालका मन्त्री भारतीय प्रधानन्यायाधीशको सपथमा ! सर्वोच्चका दुई न्यायमूर्ति र मुख्य रजिष्ट्रारसमेत दिल्लीमा

काठमाडौं । नयाँदिल्लीस्थित राष्ट्रपति भवनमा सोमबार आयोजित भारतीय प्रधानन्यायाधीश सूर्यकान्तको सपथ ग्रहण एवं पदभार ग्रहण समारोहमा नेपालका कानूनमन्त्री सहभागी भएका छन् ।

मंसिर २ गतेको मन्त्रिपरिषद बैठकले औपचारिक निर्णय नै गरेर भारतीय प्रधानन्यायाधीशको सपथग्रहण कार्यक्रममा नेपालका कानूनमन्त्री अनील कुमार सिन्हालाई पठाएको हो ।

मन्त्रिपरिषदले सिन्हाको मात्रै भ्रमण स्वीकृत गरे पनि उनी सपरिवार दिल्ली पुगेको स्रोतले बतायो । मन्त्री सिन्हा सोमबार सपथ ग्रहणमा सहभागी भएर मंगलबार पनि उतै रोकिएका छन् । बुधबार भारतीय सर्वोच्च अदालतले संविधान दिवसका अवसरमा आयोजना गर्ने कार्यक्रममा सहभागी भएर मात्रै उनी नेपाल फर्कने छन् ।

दुई न्यायमूर्ति र मुख्य रजिष्ट्रार पनि दिल्ली पुगे

नेपालको सर्वोच्च अदालतका प्रधानन्यायाधीश प्रकाशमानसिंह राउत पनि भारतीय सर्वोच्च अदालतको निम्तोमा दिल्ली पुगेका छन् । मुख्य रजिष्ट्रार विमल पौडेल र कानूनमन्त्री सिन्हासँगै उनले भारतीय समकक्षीको सपथ ग्रहण समारोहमा सहभागिता जनाएका छन् ।

यता, दोस्रो बरियतामा रहेकी न्यायाधीश सपना मल्ल प्रधान पनि मंगलबार दिल्ली पुगेकी छन् । उनी भारतीय संविधान दिवसको अवसरमा त्यहाँको सर्वोच्च अदालतले बुधबार आयोजना गर्ने समारोहमा सहभागी हुन दिल्ली पुगेकी हुन् ।

यो पनि-

भारतका नवनियुक्त प्रधान न्यायाधीश सूर्यकान्त : विवादित इतिहास, गर्विलो चुनौती